Hripui vanga inkhuahkhirhna 'lockdown' chu Mizorama sumdawng hrang hrang te chuan an tuar nasa hle a, sawrkarin engemaw ti zawng tala an harsatna sutkian sak dan ngaihtuah se an duh hle tih an sawi.

Mizoram Merchant Association (MIMA) President PC Laldinthara chuan lockdown chu sumdawng ten an tuar nasa hle tih a sawi a, "Dawr luah man, kan hnathawk te hlawh bakah kan kudam (godown) luah man te kan pek reng a ngaih laiin dawr kan hawng thei lova, kan hloh nasa tawh hle a ni," a ti a. Lockdown chu an do hran lo tih sawiin sawrkarin engemaw ti talin ruahmanna siam se an duh tih a sawi bawk a. "State dangah chuan dawr hawn hun bithliah te siamin hmun thenkhatah chuan an inhawn chhawk bawk a, hetiang duh hian ruahmanna awm ve thei se kan duh hle a ni," a ti bawk. PC Laldinthara chuan an fimkhur hle tih sawiin dawrkai atanga hri inkaichhawng an awm lemlo niin a sawi bawk.

Mizoram Business Coordination Committee Secretary Joe RZ Thanga pawhin sumdawnna te a kaltluan theih loh avangin an tuar nasa tawh hle niin ZALEN a hrilh bawk a. "City bus neitu te pawhin an driver leh conductor te hlawh a chanve a pek nise an ti chungin hlawh pek harsatna te pawh an awm tawh a. Dawr te pawh hi a ni kar thlakin hawn nise kan duh hle a ni," a ti bawk. Joe RZ Thanga chuan harsatna an tawh laia an thil thlen engemaw zat sawrkarin a tih hlawhtlin sak avanga lawmawm an tih thu sawiin, "Loan la te an rulh hun chhung min ngaihhnathiam te, Transport department in fee pek hun min pawhsei sak leh thildang te avangin sawrkar chungah lawmthu kan sawi a ni," a ti a. Sumdawng te chu an hnathawk te hlawh pe hram hram turin an in ngen tih a sawi bawk.

Dawrkai nu pakhat pawhin inkharkhip avanga an eizawnna ber dawr an hawn theih loh avangin an tuar hle tih ZALEN a hrilh bawk a. "Man chawi in mi dawr kan luah a, kan luah man pek reng a ngaih laiin lockdoen vangin kan in hawng hleithei lova. Tun hnaiah sawrkarin zingkarah inhawn theih hun han siam mahse a hun hi a tawi avang leh mi tam ber an la thawh hman loh avangin kan inhralh tlem em em mai a, hun tha inherchhuak thuai se kan duh hle a ni," a ti ve bawk. 

Loneitu pa pakhat pawhin thlai thar hralh kawngah harsatna nasa tak an tawk tih ZALEN hrilhin, "Tuna sawrkarin kar khata vawi khat chauh thlai zawrhna hun a siam hi kan tuar hle a. Kan thlai te kan hralh theih loh avangin sum lamah pawh nasa takin kan lakluh tlem phah a ni," a ti ve bawk.