Taksa sawizawi ‘exercise’ hi hnam fing zawkte chuan an ngai pawimawh hle a. Hriselna leh dam reina mai bakah hlimna thlentu a nih tel bawk avangin an uar hle.

Mi thiamte chuan kan taksa hi ni khatah darkar chanve vel tal sawizawi thin nise tha an ti a. Mahse, mi tam ber chuan minute 30 chhung lek pawh hi kan taksa kan sawizawi ngai lo a. In lum atangin lirthei hmangin hnathawhna hmun kan pan a, daihlim hnuaiah hna thawkin thlan kan titla lo a. Chumai ni lovin chhunah fast food kan ei bawk nen, natna inkaichhawn theih loh chi - zunthlum, thisen sang leh natna dang vei pawh Aizawlah chuan kan tam hle.

Tun hnai hun eng emaw chen atang khan thalai thi an tam hle a, heng zinga tam tak hi ruihhlo vang a ni a. Kan taksa kan sawizawi that tawk loh vanga thi pawh thahnem tak an awm a. Nikum chhunga Mizoram damdawi in hrang hranga thi an chhinchhiah zingah pawh thisen sang kaihhnawiha thi an tam hle a, heng thisen sangte hi inthlahchhawn tam tak awm mah se ei leh in fimkhur loh vang leh taksa sawizawi that loh vanga BP sang an tam hle.

Pa pakhat chuan, “Mizote hi sa kan ei nasa a, chumai bakah ruihtheih thil chi hrang hrang kan ti dem dum mai bawk si a. Kan taksaa thil tha lo awmte paih chhuak turin taksa sawizawia thlan tihtlak kan taima leh si lo a, hei vang hian harsatna tawk kan tam phah niin ka hria,” tiin ZALEN a hrilh.

Pa pakhat pawhin Aizawl lam ai chuan thingtlang lama khawsa te chu dan tlangpuiin an hrisel zawk nia a hriat thu leh an hrisel zawk chhan chu exercise an lak that vang nia a hriat thu sawiin, “Thingtlangah chuan hna an thawk nasa a, an thlantui a chhuak nasa in an taksaa tûr leh thil tha lo awmte an paih chhuak nasa bik a, hei vang hian an hrisel phah niin ka hria,” a ti.

Aizawl khawpuiah chuan tun hnai favang chho atang khan zing lama excercise la hi kum dang ang bawkin an thahnem hle a; mahse, dan tlangpuiin nipui hnaihah heng mite hian an tawpsan leh thin a ni.