Tunhnai eng emaw atang khan thalai zingah stroke leh lungphuchawla thi an tam hle a. Hetiang a tam chhan hi ei leh ina fimkhur tawk loh vang leh taksa insawizawi that loh vang niin mithiamte chuan an sawi.

Civil Hospital, Aizawla senior medicine doctor pakhat chuan, “Stroke hi tunhma deuh kha chuan upa lam neih deuh thin a ni a. Mahse, tun hnaiah hian thalai, kum 40 hnuai lamah pawh an tam hle a. Hei hi a chhan ber chu thil mawm leh thlum kan ei tam a, kan taksa a chet tam leh si loh vang hi a ni,” a ti a. Stroke leh lungphuchawl chu thisen sang nei, zunthlum leh ruihhlo ti thin te lakah a awm hma bik niin a sawi bawk.

National Health Mission a thawk Doctor pakhat pawhin stroke leh lungphuchawl awm chhan ber chu BP sang control loha a awm reng thin vang a ni tlangpui tih a sawi a. "Ei leh in ah kan insum lo a, vawk thau leh sa kawchhung kan ei nasa bawk si a. Taksa insawizawi lam kan ngaihthah bawk si hian a ti tam a ni," a ti a. "Ei leh in tha ei ila. Office hnathawk te pawhin thu tawp lovin ke in kal tam ila stroke leh heart attack hi kan pumpelh ngei ang,” a ti bawk. 

National Health Mission hnuaia Non-communicable diseases (NCD) lam buaipuitu Doctor chuan stroke leh lungphuchawl chu tam thar thut lo mahse thalai zingah he natna avanga harsatna tawk erawh an tam hle niin a sawi a. Natna inkaichhawn theih loh NCD chungchangah Mizoram chu cancer ah a sang ber kan ni a, zunthlum leh BP sang lamah erawh chuan a sang pawl kan ni lemlo niin a sawi bawk.

Aizawl private damdawi in a thawk Doctor pakhat pawhin Covid-19 in stroke leh lungphuchawl a ti zualkai niin a sawi a. "Kum 2 tal deuh tawp mai kan tawm a, zan meng reiin ei leh in kan ti nasa a. Noodles leh frozen food kan ei tam bawk a. Hei hian stroke leh BP sang a thlen tam niin kan hria a ni," a ti bawk.