Mizoram hi ruihhlo siamna hmunpui, golden triangle hnaia awm kan ni a. Kan state chhungah tun hnai maiah pawh ruihhlo eng emaw zat man a ni a, hengte hi tam tak Mizoram chhunga tihral tur a nih laiin a tam zawk hi chu Mizoram pawna kal zel tur niin an sawi. Kan thalai zingah ruihhlo a hluar a, hemi tihreh tur hian thawhhona tha a pawimawh tih mi thiamte chuan an sawi.

Mizoram University leh Fullbright Speacialist tangkawp chuan tun hnai khan ruihhlo ngaite enkawlna kawnga hma latu pawlten ruihhlo ngai enkawl damte enkawl chhunzawm dan tur chungchangah inrawnkhawmna an buatsaih a. Mi thiam kalkhawmte chuan ruihhlo ngai enkawl leh buaipuina kawnga thawktute thawkho se tun ai hian hmasawnna nasa tak a awm theih an rin thu an sawi.

He inrawnkhawmnaah hian ruihhlo tite kawng dik zawh tura fuih phur, Motivational Interviewing chu thil tangkai leh Mizote nun nen pawha inhmeh rem tak niin an ngai a. Hma la tur hian department khat chauhin a theih lohzia hre tlangin, mahni chan puala ngai theuha thawhhona tha zawk nena hmalak a tulzia an sawiho a. Insititute hrang hrangah bakah kohhran leh sawkar enkawl de-addiction centre-ah counseling training uar lehzuala hmalak ni se, an ti.

Thusawitu hrang hrangte chuan Mizote miziaa ruih duh lutukna rilru awm chu mak an tih thu leh zirchian ngai an tih thu te an sawi a. Ruihtheih thil khawihtute treatment centre/ home-ah harsatna awm miah loin an awm a, harsatna lo awm leh hun chu centre atanga an chhuah hnu a ni zawk tih sawiin Mizo society hian anni ho hi kan lo en dan a dik loh vang a ni thei ang em tih te, camping centre atanga an chhuah zawha enkawl dan tha leh zual ngaihtuah a tulzia leh an tluk leh hmaa enkawl leh vat an nih theih nan thawhhona tha lehzual awm se an duh thu te an sawi.

Health dept. aiawha kalte chuan rilru lama harsatna neite enkawlna turin awlsam zawka tanpuina an dawn theih nan phone kaltlanga biak theihna ‘TeleManas’ Counseling chu Oct. 10, 2022 khan tan a ni tih a tarlang a. Synod Social Front lam chuan tunhmaa an lo tih tawh thin angin, ‘After Care Service’ nasa lehzuala hmalak an tum tih an sawi a. Social Welfare & Tribal Affairs lam chuan ruihtheih thil khawih tawhte hi an tluk lehna chance a san avangin chhungkua leh khawtlangah hman tangkai dan kan thiam tlan a pawimawh tih an sawi bawk a. Central YMA aiawhte chuan ruihhlo an do kawngah police leh excise-te nen an thawkho tha tih an sawi.

Kalkhawmte hian resolution siamin thawhhona tha lehzual hnuaiah ruihhlo ngaite enkawl zuina mumal leh tha, kan hnam leh kalphung mila a awm theihna turin committee din ni se an ti bawk a ni.