Environment humhalh kawngah Mizote kan thangharh chho zel a, kum 2020-a kawngsira ding, thingkung paruk reh hlum tuma mi tute emaw chetna pawhin Mizoram a fan chhuak a nih kha, tam tak chuan kan la hriain a rinawm.

May, 2020 khan kawngkam thingkung puitling tawh, Tuidam leh Kawrthah inkar, Kawrthah ram chhung, Kawrthah atanga km 5 vela awm, kum 1986-87 chho vela phun tawh, kum 34 vela upate chu reh hlum tumin, mi tuten emawin a bul lamah thuk takin an sat rek a, a hunlai chuan helai tlangdung mipuite pawh an rilru a na em em a ni.

Kawrthah Chhim veng leh Hmar veng Branch YMA chuan Kawrthah Divisional Forest Officer (DFO) hnenah pawikhawihtu man chhuaka hremna pe tura ngenna an thehlut hial a nih kha.

Heng thingkung paruk, kawngkama dingte hi an thih mai lohna turin forest thawktute leh YMA lam chuan theihtawp an chhuah a, damdawi nen sah rek an nihna lai an tuam a, hetihlai hian heng thingkungte hi an nung zui ta lo.

Kutthlaktute lakah forest department lamin hma lain, thing dang phuntir an ni a, tunah chuan chung an thingphunte pawh chu mihring puitling chen vel a sang an ni leh tawh.

Tunlai hunah chuan engkim deuhthaw hi social media nen kan thlunzawm deuh vek tawh a, chung khawvela cheng tawhte chu kan ni.

Hei vang hian kawng hrang hrangah a tha zawng leh a chhe zawng pawhin mipuite kan harh thar mek zel a, chung a tha lama kan harh tharnaah chuan enviroment humhalh pawh hi a tel a tih theih ang.

Ho tê-ah ram pum huapa mualpho theih a ni a, a bikin forest plantation chhungah phei chuan tute pawh hian fimkhur kan chhuah a ngai takzet a ni.