DOWNLOAD OUR APP

Read latest news on your phone
app-store

Feature : Thlai rate zawm hlawh lo

Jun 13, 2021

Sa leh chawhmeh man to uchuak taka zuar an awm thin tih hriat a nih avangin Committee chuan sa leh thlai man an bithliah

Hripui avangin inkharkhip a ni a, ni dang angin khawsak theih a ni lova, thlai leh thildang dang pawh a to sawt hle. Hei hi hria in Mizoram sawrkar chuan Aizawl DC chu “Committee for Fixation of price of meat, vegetables and fruits within Aizawl Municipal Council (AMC)” Chairman atan a ruat a, sa leh chawhmeh man to uchuak taka zuar an awm thin tih hriat a nih avangin Committee chuan sa leh thlai man an bithliah a ni. 

Committee ruahman ang chuan thlai rah leh anhnah te chu buk (kg a hralh) vek tur a ni a, Aizawl Municipal Corporation huamchhunga Local Council te chu an area theuhah wholesale leh retail-a thlai leh sa zuar thin ten sawrkarin rate a bithliah an zawm leh zawm loh chungchangah hma la turin an ti a, dan bawhchhiate hrem theihna pawh an kutah dah a ni. Heti hian sawrkarin ruahmanna siam mahse thlai zuar te chuan an zawm lem lo.

ZALEN in chawhmeh zuar thenkhat a kawmna ah sawrkar thupek chu zawm a harsat thu an sawi. Chawhmeh zuar pakhat chuan sawrkar ruahmanna anga kg a buk vek chu duh hle mah se, an lakna ten an buk miau loh avangin thil tih theih a ni lo tih a sawi a. "Kan chawhmeh lakna te hian a kg in min pe lova, a tela min lak tir tlat avangin kan tan chuan buk chu a theih loh a ni," a ti a. Chawhmeh zuar nu pakhat pawhin, "Thlai hi tih tlawm duh mah ila kan lakna ten an tih tlawm loh chuan tihngaihna a awm lo a ni. Keini hi chuan thlai chingtute hnen atanga la lovin tu te emaw commission te hnen atanga kan lak veleh chhawn a ni a. Hlep nei lo chuan zawrh theih a ni bik si lova chuvangin sawrkar rate siam hi zawm a har khawp mai," tiin a sawi ve bawk.

ZALEN in a biaknaah Chanmari Local Task Force hruaitute chuan sawrkar rate siam chu an hriatpui lemlo niin an sawi a. "Kan vengah chuan a pangngaiin an la zuar a, chawhmeh hi an lakna ah kg a lak a nih loh chuan helaia kg tura lo tih hi a theih loh ah kan ngai," tiin an sawi. Mission veng Task Force hruaitute chuan chawh- meh rate chungchangah tun aia mumal zawka kal dan hi awm se an duh thu an sawi a, sawrkar rate siam thenkhat chu hman theih loh niin an hria a. Sawrkar lama chawhmeh rate endik tur squad lam hian hriattirna mumal an la pe lo a, tawiawm turin pawhin an la sawm lo niin an sawi bawk.

Committee for Fixation of price of meat, vegetables and fruits within Aizawl Municipal Council hotute chuan sawrkar rate siam tih hlawhtlin chu Local Task Force te kutah a innghat niin ZALEN an hrilh a. "Sawrkar ruahmanna tih hlawhtlin hi Task Force te kutah a awm a, power pawh an kutah a awm bawk a. Tunah hian zaa za hi la fel lo mah se, ti hlawhtling turin hmalak zel kan tum a ni," an ti a. "Tunah hian lei theihna rate sang ber kan bithliah a, mirethei ber pawhin an lei theih nan ruahmanna kan siam a ni," an ti bawk.

Share now