July 23, 2024 khan Union Finance Minister Nirmala Sitharaman chuan parliament-ah kum 2024-25 chhunga India ram sum hman tur, union budget a pharh a, tun tum hi budget a pharh tum 7-na niin India finance minister zinga budget pharh tam ber a ni.

Budget pharh tak atanga a lan danin kum 2024-25-a sawrkar sum hman tur zawng zawng hi Rs. vaibelchhe 48,20,512 a ni a, hei hi kum hmasa 2023-24 aiin 8.5% in a tam a ni.

Budget thara sum hmuh tur zawng zawng hi Rs. vaibelchhe 32,07,200 niin kum hmasa aiin 15% in a tam zawk a. Revenue expenditure tur hi 3.2% leh capital expenditure hi 16.9% ni tura chhut a ni.

Finance minister-in budget a pharh tak atanga langsar zualte chu thil man sanna chu a hniam zawnga a kal beisei a ni a, prime minister scheme hrang hrang tihhlawhtlin nan vaibelchhe nuai 2 dah a ni.

Union budget 2024-24-ah hian ram venhimna (defence)-ah sum dah tam berin Rs. vbc. 454,773 dah a ni a, a dangte chu RD Rs. vbc. 265,808, agriculture Rs. vbc. 151,851, home Rs. vbc. 150,983 leh education Rs. vbc. 125,638 te chu a tam zualte an ni.

Manipur chief secretary hlui, PC Lawmkunga, IAS (Rtd) chuan India chu khawvela economy lian panga zingah a tel tawh tih sawiin buhfai-ah a intodelh bakah tel leh bawnghnute-ah pawh hma a sawn nasa hle niin a sawi a. Budget pharh tak chu tute emaw tihlawm tumna a ang deuh nia sawiin, “BJP thawhpui, JDU leh TDP te tihlawm tumna a ang hle a. Andra Pradesh khawpui thar dinna atan Rs. vbc. 15,000 pek leh Bihar-a express kawng siamna atan Rs. vbc. 23,000 dah a ni te hi TDP leh JDU tihlawm tumna a ang hle a. Hetiang zela kan kal chuan nakinah ram tan a la tha lo mai ang tih ka hlau a ni,” a ti.

Budget-ah hmarchhak bial a lang mang lo chu mak a tih thu sawi bawkin, “Assam leh Sikkim khuarel chhiatna thleng tan dah a nih bakah state dang tan dah a ni lo hi a mak a. Mizoram bikah pawh Indo-Myanmar border trade a lang lo te, Manipur, Myanmar leh Bangladesh atanga raltlan mi eng emaw zat lo lut chungchang sawi a ni lo te hi mak ka ti hle a ni,” a ti.

Department of Economics, Mizoram University-a Associate Professor Dr. James LT Thanga chuan budget chu hmasawnna ropui tak nia a hriat thu a sawi a. “Ram dang kuta India inghahna hi a tlahniam ve zel a. Foreign exchange reserve-a India sum neih hi US billion dollar 653 niin kan dinhmun a tha a, thil man pung (inflation) pawh a ziaawm a. India economy hi a him thawkhat bawk a, a lawmawm hle a ni,” a ti.

Dr. James chuan chhiah atanga sum hmuh tur zawng zawng chu Rs. vaibelchhe nuai 38 a ni tih sawiin hemi atanga state-te insem leh tur chu Rs. vaibelchhe nuai 12.47 a ni tiin nikum lam aiin 10%-in a pung niin a sawi bawk.

BJP Mizoram Pradesh president Vanlalhmuaka chuan union budget chu tha hlea a hriat thu sawiin, “Budget hi Mizoram-in kan chhawr thiam chuan hmasawnna hnathawhna tur a tam hle a. Kan project-te pawh central scheme mila kan siam rem a pawimawh a ni,” a ti bawk.