Kum engemaw zat kalta atang khan Kristian te hunpui Krismas leh Kumthar pualin biakin chei kan ching tan a, a hnu deuhah phei chuan biakin mai ni lovin kan in leh a vel kan chei a. Chumai chu duhtawk lovin kawn/hmun remchang chei kan chhunzawm ta zel a, hei hi veng/khua tilartu tak pawh a ni a, chu mai bakah kan hunpui kan hlutzia tarlangtu pawh a ni awm e. Kum 3/4 kalta vel kha veng chei kan uar ber hunlai a ni awm e. Veng tam takin an kawn leh hmun remchang laite cheiin mipui mit la thei ber tur nia an hriatin eng chi hrang hrang an hmang a. Mahse, tun hnai kum 2/1 ah erawh veng chei hi kan uar ta lo viau mai. Kum 2017 khan UD&PA Department chuan Aizawl khawpui veng cheimawite lawmman a pe a, mahse heti chung hian kum hmasa lama veng chei aiin an tlem hle. Nikum 2018 Krismas pualin Tourism Department chuan veng chei mawite lawmman pek a tum thu a puangzar a, lawmman pawh a tawktarh tha hle a, pakhatna Rs. nuai 4, pahnihna Rs. nuai 3 leh pathumna Rs. nuai 2 turin ruahmanna a siam a, mahse heti chung hian tih tak zeta veng chei erawh an thahnem lo hle. Tourism department hian veng/kawn chei te in report tura an ngen angin chei in-report hi 20 an awm a, chungte chu- Armed veng, Electric Veng, Aizawl Venglai, Ramhlun South, Ramthar, Chanmari West, Dawrpui Vengthar, Falkland, Durtlang, Durtlang North, Chaltlang, Tuikhuahtlang, Venghlui, Republic Vengthlang, Upper Republic, Tlangnuam, Hlimen, Khatla East, Zarkawt leh Mission Veng te an ni a. Heng in report te hi Tourism Deptt., Central YMA leh MJA aiawh ten tehna hrang hrang hmangin an endik a ni. Tun hnai kum 2/3 kalta atanga vei chei an tlem tak chhan Zalen zawhna chhangin kum danga vei chei thin YMA hruaitu pakhat chuan senso a san vang leh thawh tur a tam vang niin a sawi. “Mipuite hip tak tak tur chuan a cheina hmanrua hi a ngai tam em em mai a, a cheina hmanruate hi a to em em bawk a. Hei mai ni lovin a sum leh hmanrua pawh hi awm se a cheitu lam hi a buaithlak thin a, zan 2/1-a chei zawh mai theih a ni lo a. Tlaivar thak thaka kan thawh changte a awm a, hun a duhrei bawk avangin kan tlin lo ni berin ka hria,” tiin Zalen palai a hrilh bawk. Kumin veng chei nalha thlan Ramhlun South, Chaltlang, Tuikhuahtlang leh Mission veng (Sikulpuikawn) te chuan tlawhtu an ngah hle a, a chang phei chuan lirthei chu sawi loh mihring pawh a ‘jam’ hial thin niin an sawi. Kumina chei nalh bera thlan Ramhlun South-ah hian 3D thlalakna an siam, Krismas tree leh eng chi hrang hrang an pholan te chuan mipui hlut a hlawh hle a. Pahnihna Chaltlangah hian Krismas thlenina Mizo hmanlai thil chi hrang hrang an dah chuan hlut a hlawh hle bawk. Lawmman pakhatla latu Ramhlun South leh pahnihna Chaltlang te hian lawmman an dawn lawmnan January 10, 2019 thleng veng chei hi mipui tlawh theihin an hawng ang.