ZALEN December 1, 2024 : December 1 hi kum 1988 atangin khawvel pum huapin World AIDS Day atana hman thin a ni a. UNAIDS leh WHO kaihhruai helama inhmang ten kumin 2024 thupui atan ‘Take the right path: my health, my right’ tih thlan a ni a, Mizo tawng chuan ‘Kawng dik zawh ang che. Ka hriselna chu ka dikna chanvo a ni’ tiin a dah theih ang.

Khawvela he natnain ngaihven a hlawh chhoh tanna chu kum 1981 atang khan a ni a, US khawpui lian pahnih, California leh Los Angeles-ah mahni anpui kawp thin mipate zingah hmuh chhuah tan a ni a, a hnuah hetiang natna hi hmeichhe mahni inzuarte zingah pawh hmuhchhuah a ni ta zel a, kum 1983 khan he natna hi AIDS tia thlak a lo ni ta a ni.

India-ah chuan kum 1986 khan Chennai (Madras)-ah hmeichhe inzuar (KS) mi paruk hmuhchhuah an ni a, khawvelin a hmelhriat danin a zir loh vangte pawh a ni mai thei, India-a HIV hrik kai hmuchhuaktu doctor-te hi a tirah Tamil Nadu sawrkar chuan mualphonaah ngaiin a suspend nghe nghe a ni.

Mizoramah chuan October, 1990 khan damdawia inchiu thin atangin hmuhchhuah tan a lo ni ve ta a nge nge a ni.

October, 1990 atanga kumin March thla thlenga Mizorama HIV kai hmuhchhuah zat, sawrkarin a chhinchhiah zat chu 30,523 an tling tawh a, chung HIV kai hmuhchhuah zinga kum 15-49 chu 91.23% zet an ni.

Hengte hi MSACS-in HIV hrik kai an chhinchhiah zat an ni a, he natna hrik kai reng mahse test leh hmuhchhuah miah loh hi engzat nge awm ang? AIDS natna avanga thi zat hi mi 5,021 nia chhinchhiah a ni a; mahse, hengte hi chu hriat chian leh record chauh an ni a, ART damdawi la zeta tawpsah leh ta daih, khawiah nge an awm tih hriat tak loh, an thi tawh em tih hriat tawh si loh pawh tam tak an awmin a rinawm bawk.

HIV hrik kai zingah hian naupang kum 14 hnuai lam mi 778 lai chhinchhiah an ni tawh bawk a, a tak takah chuan mi 800 chuang an tling hial mai thei bawk a ni.

Khawvel ram changkang zawkah kum tin HIV kai thar zawi zawiin an tlem zel a, ram thang lai leh rethei zawkah he natna hi a darh chak a, buaipui a hlawh a ni.