Mizote hi zirna ngaisang hnam kan ni a, India ramah pawh ziak leh chhiar thiam lama a sang ber dawttu kan ni pha hial. Ramri depa awm mi thenkhat tih loh phei chu ziak leh chhiar thiam lo tawp chu an vang hle awm e. Mahse, hetih lai hian eizawnnatlak tak taka thiam erawh kan tlem hle thung.   Mizo lehkhathiam tak tak leh eizawnna tlaka hmang thei kan tlem chhan hi engvang nge ni ta ang le? Kan kalkawng, tuina leh mamawh kan thlan thiam loh vang a ni thei mai em? Mi tam takin kan tuina zawng ni lo, tha nia kan hriat leh thiante lo zir tawh zir kan tum avangin hlawhtling taka zir chhuak tur tam tak chuan an tum an thleng lo fo niin a lang. Matric hnuai lamah chuan subject thlan bik awm thei lovin a zavaiin kan zir a, matric pass hnuah erawh mahni tui zawng kawng a zawh theih tawh thung. Mahse, hei pawh hi mi tam tak chuan kan la chhawr tangkai thiam lo ta fan a, matric-a pass tha deuh chu Science emaw ,Commerce la turin kan ti/ngai ringawt a; mahse, an tuina subject a lo nih loh thin avangin zirlai tam tak chu an beidawng leh thin.   Tun hnai kum eng emaw zat kalta atang khan mi thahnemngaite chuan phai lam zirna in thate chah chhuakin zirlaite nen hmaichhanah inkawmna hun an siamsak a, hei hi zirlai tam tak chuan an chhawr tangkai hle. Mahse, heng institution-te hi zirna sang zawk zirnate an nih hlawm avangin High School zirlaite chuan an chhawr tangkai phak ve lo a, hei hi hriain tun hnai khan Lynchpin leh Zalen tangkawp chuan ‘School Connect’ tih hming vuahin Vanapa Hall-ah ni hnih awh seminar an buatsaih a, zirlaite chu seminar neihpuiin an subject tui zawng leh an hma hun an sawipui a, zirlaiten hlawkthlak an ti hle.   School Connect-a tel zirlai pakhat chuan, “Matric pass hnuah eng nge ka zir ang tih leh eng kawng nge ka zawh ang tih hi seminar ka neihnaah hian ka hmu chhuak a. Tun atang chuan ka zir chhunzawm zelna atana tangkai tur ka hriat theih phah a, lawmawm ka ti hle a ni,” a ti.   School Connect chhimtu zirtirtu pakhat pawhin zirlaite hma lam hun sawipuina ‘career guidance’ lampang chu tun aia uar zawka zirtir nise zirlaite pawhin hma an sawn lehzual a rin thu a sawi.   School Connect chhimtu pa pakhat chuan zirlaite seminar neihpui chu tha a ti hle tih sawiin hemi denchhena institution inpho pawh kum dangah chuan tun aia tam ni thei se a duh tih a sawi a. “Tuna stall rawn neite hi chu central India lama mite an ni a, Mizo mipui tam berin state pawna kan pan thin Shillong leh Guwahati atangte institution tam zawk sawm ve nise tun ai hian kan hlawkpui lehzual ka beisei a ni,” a ti bawk. &&&&&