Zoram Medical College (ZMC) ah Covid 19 test na RT-PCR khawl 4 hmangin swab sample endik hna thawh mek a ni a, hetihlai hian Covid hri vei damlo enkawlna chu damlohna dang aiin a let 10 velin a hautak ni a thudawn a ni.

ZMC Director Dr. John Zohmingthanga hnen atanga ZALEN thudawn danin, swab sample endikna RT-PCR Laboratory chu Microbiologist, Doctor 2 leh Associate professor (Doctorate degree nei) 2 bakah, Scientist, Lab technician leh Data entry operator ten enkawlin, sample endik tur tam dan a zirin RT-PCR khawl hman thin a ni. 

ZMC Director sawi danin ZMC ah Covid vei enkawlna, ICU ward nen khum 244 a awm mek a, a tul dan anga tihlen belh theih ni mah se tih len belh dawn chuan building sak lai mek te a nih hlawm avangin hna a muan deuh rin a ni. Covid vei damlo enkawlna chu ICU leh ward rau rau ah a let 10 velin a hautak tih sawi bawkin, damlo enkawltu nurse te chu PPE nen a lut an nih avangin inthlak zin a ngai a, chu chuan manpower a heh hle niin a sawi.

Covid vei enkawlna hmun ZMC ah volunteer mi 50 bawr vel an awm mek thu leh, chung mite chu volunteer group hrang hrangah then an nih thu ZMC Director chuan sawiin, "Ei tur lo sem te, bawlhlawh lo senghawitu te thlengin an awm a, an hlu hle em em vek a ni," a ti. Covid vei enkawlna hmun, ZMC awmna Falkawn mai bakah an tlangdung mipuite fakawm a tih thu Dr. John Zohmingthanga chuan sawi bawkin, "An rilru zauhna te, an inpekna te entawntlak a ni tak zet," a ti bawk.

ZMC RT-PCR Laboratory enkawltu Microbiologist te chuan tun dinhmunah chuan sample endikah harsatna a awm lo tih ZALEN an hrilh a, RT-PCR khawl leh thawktu lam ah indaih lohna a awm loh thu an sawi. "Pathianni zan tih loh zan dang zawngah thawktute inbanlet in tlaivarin sample endik hna thawh thin a ni," an ti.