Federico Chiesa

Admin - Jul 10, 2021

Cremonese, Sampdoria, Parma, Fiorentina, Lazio leh Siena-a lo khel tawh

Euro 2020 khelh meka zanina final khel tur zinga pakhat zawk, football ram ropui, Italy-in innghahna atana an hman, Enrico Chiesa hi a pa atang renga ram tana thawk hlawk a ni.

Genoa khawpuia October 25, 1997-a piang, Chiesa hi a pa chu Italy national team mai bakah Italian club langsar tak tak - Cremonese, Sampdoria, Parma, Fiorentina, Lazio leh Siena-a lo khel tawh thin, Enrico Chiesa a ni a, a pa chhun fuh a, tunah hian Italy team-a winger pawimawh ber a ni mek.

Chiesa hi Serie A club lian, Juventus-ah a khel mek a, amah neitu tak erawh Serie A club tho, Fiorentina a ni a, Turin khawpui club hian an hawh (loan-in an la) tihna a ni.

Rawlthar a nih chhuah hlimah Chiesa hian Florence khawpui hmarchhak lama Settignanese-ah bul a tan a, hetah hian Fiorentina legend Kurt Hamrin chuan a hrual thin.

Kum 2007 khan Fiorentina hi a zawm a. An naupang team, Giovanili an tihah awmin a thiam pawl a ni a, 2014-15 season khan under-19 squad-ah a tel phak a, Primavera-ah vawi sarih inlanin goal khat a thun a. A dawt leh season-ah erawh vawi 23 inlan phak tawhin goal sarih ngawt a thun a. A chet that chhoh bakah a kum pawh a lo tam ve hret tak avangin February, 2016 khan Fiorentina chuan professional contract an ziahpui ta a ni.

2016–17 season khan season hawnna inkhelah Juventus tlawhin 2–1 in chak lo haw mah se a vawi khat nan Serie A inkhelah a inlan a. Fiorentina manager Paulo Sousa chuan ring chhunzawm zelin September 29 chuan Europa League-ah a vawi khat nan a inlantir a, 5–1 zetin an khelmualah Qarabağ an hneh a. December 8-ah Europa League-a a vawi li inlannaah Qarabağ bawk hmachhawnin 2-1 in an chak haw a, senior team tan a goal hmasa ber a thun haw a; mahse, hemi tum hian yellow card vawi hnih hmuin hnawh chhuah a ni.

2017–19 season chhung pawhin Chiesa hi naupang tê ni chungin Fiorentina tana mi pawimawh niin league-ah phei chuan a inlan deuh ziah a, goal pawimawh a thun zauh zauh va, AS Roma lakah Coppa Italia-ah hattrick hial a siam bawk.

October 5, 2020 khan Juventus chuan loan-in kum hnih chhung atan an la lut a, a season khatnaah € maktaduai thum leh hnihnaah € maktaduai sarih an seng dawn a. Hetah pawh tangkai zelin Uefa Champions League velah pawh a inlan phak tawh.

Share now