A vawi kua nan FIFA Futsal World Cup chu zanin dar 8;30 atang hian khelh tan a ni dawn a. Infiamna khawmpui lian tham la thleng ngailo Lithuania chuan Europe khawmualpui zinga a pathumna ni turin Futsal world cup hi an thleng dawn a ni. 

Futsal World Cup 2021 tournament hian September 12 atanga October 3, 2021 thleng a awh ang. World cup hi Covid-19 vangin an sawn hla a ni. FIFA Futsal World Cup-ah hian confederation hrang hrang  atangin team 24 an inlan dawn a, group A, B, C, D, E leh F-ah in thenin, group khatah  ram pali zel an awm. Tournament hi stadium pathum Kaunas, Klaipeda leh Vilnius-ah te khelh a ni ang. 

Group stage bik hi September 12 – 20 chhung an khel ang a, round of 16    hi Sept. ni 22 – 24 chhungin an khel zo bawk ang a, ni hnih chawlin September 26 leh 27-ah te Quarter-final an khel ang a, nikhat an chawlh hnuah September 29 leh 30-ah Semi-Final an khelh chhunzawm ang. Final hi October ni 3-ah an khel ang. 

Team tin hian player 25 an nei theuh dawn a, pathum te chu goalkeeper an ni ang. Preliminary squad atang hian player 14 thlang chhuakin goalkeeper pahnih an awm thung ang a,  final squad player-ah hian inhliam an awm palh a nih chuan an squad atangin inhnawh khah phalsak an ni ang. Group tin atangin team hnih leh group hrang hrang atanga pathumna zinga point hmusang pali ten round sang zawk an lut ang.