DOWNLOAD OUR APP

Read latest news on your phone
app-store

FIFA World Cup 2022 Qatar-a ka thil tawn leh a behbawm

Dec 14, 2022

Security pa chuan min hruai kual min hruai kual a, an pu ber (officer) hnenah ‘ka kut ka sil e’ tiin a hnenah min thlen ta. Ram 20 chuanga lo zin ve tawh ka ni a, Air, Land, Port security te vawi za tam ka lo paltlang tawh. Heti teh chiama kuhva buaipui ka la tawng chhin lo!

C. Lalnuntlinga, CMS Holidays

Khawvela ennawm ropui, FIFA World Cup 2022 chu Qatar khawpui, Doha-ah khelh mek a ni a.  Mi tam zawkin World Cup lama rilru kan sen lai a ni bawk a, tun tumah hian World Cup en tura Qatar-a ka thil tawn thenkhat te, World Cup boruak leh thunawi dang te, Russia World Cup 2018 leh Qatar World Cup khaikhinna tlem kan tarlang dawn a ni.  

Mizoram atangin keini group mi 12 chu ni 5 leh zan 4 chama World Cup a hmuna en turin November 25 khan Doha kan thleng a. World Cup tan hma kar hnih velah Denmark-France & Germany-Spain inkhel en turin ticket kan dawng fel a. Tun tum World Cup ticket hi FIFA Official Hospitality Match Ticket kan book avangin a senso pawh a sang talh talh viau mai. 

World Cup Ticket book tur hian a hma kum khat dawn atanga lo ngaihven lawk a ngai a. Sale phase 3 vel a awm thin. Ticket hi lei duh tam dan ngaihtuah chuan hralh chhuah tur a tam tawk lo va, ‘Phung zinga Piring vawrh’ an sawi ang maiin rei lo teah a zo duak thin.

Qatar ram lut tur hian Match Ticket leh Hotel Accomodation neih fel hnuah an rama luh phalna ‘Hayya Card’ an tih chu dil theih a ni. Hayya Card tel lovin Qatar a luh theih loh. Hayya neih fel tawh chuan Visa dil a ngai tawh lo thung. Russia World Cup-ah kha chuan FAN ID tiin an sawi thung a. Match ticket leh Fan ID nei tan visa dil lovin an ram kan lut thei thung. 

Qatar ram hi zimte a ni a, mihring pawh nuai 30 tling lo deuh an awm. Heng zingah hian hnathawka inhlawhfa (migrant workers) 90% dawn chu ram dang India, Bangladesh, Pakistan, Egypt, Philippines, Indonesia, Sri Lanka etc atanga hna thawk tura lut an ni. Mizo hnathawka awm pawh tlem an awm ve (10-20 vel a ni mai thei). 

WORLD CUP VOLUNTEERS         Qatari te hi an tlem em avangin an rama hna zawng zawng deuh thaw hi ram pawna atanga hna thawka lut ten an thawk a. World Cup kaihhnawihna hna hrang hrang- Volunteers, Security, Hospitality, Duty hrang hrangte hi ram rethei zawk atanga inhlawh tura an rawih ten an thawk. 

Qatari hnam zingah World Cup Valunteers an indaih loh avangin Volunteers tur hi an zawng a, Mihang, Arab leh Filipino inpawlh an ni ber mai. A tam ber chu mihang niin, Arab thlalai hmuh tur tlem an awm ve bawk. Sap kan tihte pawh ka hmuh chinah an awm ve zeuh zeuh bawk. Volunteer te hi an vaiin 20000 chuang zet an ni a, a tam ber chu Bangladesh atanga kal nia sawi a ni. 

FAN FESTIVALS    World Cup tihlutu leh Fans te ngaihven ber pakhat chu ‘Fan Festival’ hi a ni. Qatar World Cup Fan Fest pui ber hi Al Bidda Park, Doha khawpui laili takah siam a ni a. Football Match Screen lian taka enna hmun 4/5 laiah a awm a. Museum, Food court, FIFA Store, infiamna leh games chi hrang hrang khelh tur engemaw zat a awm bawk. 

Qatar-ah hian Fan Festival hi an tichangtlung hle a, kan kal lai hian Fans 20000-30000 inkar an ni hial ang. England leh USA inkhel kan en a, thawm pawh a tha hem hem hle. Match karlakah zaithiam te an zai reng a, a khawharthlak loh hle. Fan fest ringawt pawh hi World Cup tiropuitu zinga mi leh zin chhan tham a ni. Fan Fest bikah phei chuan Russia World Cup Fan Fest aiin Qatar hian an tichangtlung hle zawk.

FIFA STORE    Fan Festival-ah hian FIFA World Cup 2022 Souvenir leh Gift Items chi hrang hrang an zuar a. Customer pawh an tam hle. Items chi hrang hrang pho chhuah a ni a, a man erawh a tlawm lem lo. FIFA quality ball chu India chuan Rs. 15000 chuang a ni a, first copy an tih pawh Rs. 4000 dawn a ni. Keychain/Fridge Magnet pawh Rs. 500 dawn a ni. Heng hmunah an thil zawr hi China siam, quality tha tawk tak, man to lo thei ang bera FIFA phalnaa siam a ni. Russia World Cup-ah pawh khan China siam bawk FIFA Store/shop-ah hian zawrh a ni. 

QATAR INBUATSAIHNA    Mipui punkhawmna hmun reng rengah Security/Police leh Volunteers an tam em em vek a. Zawhna zawh pawhin hawihhawm takin min chhang mai zel. Metro, Bus, Airport etc-ah kawhhmuhtu kawi tinah an ther fer fur a, bo tum tan pawh bo theih a ni lo! Hetih rual hian Qatar ram hi Muslim kulmuk ram a ni a, khap ilo,  dan leh dun ngah tak an nih avangin fans zalenna a chep lek lek em a tih theih. 

Entirnan zu zawrhna leh leina hmun a awm a, pawn lamah ken chhuah leh in phal a ni lo. World Cup lai lo pawhin phalna nei tan bik chauh zu lei theih a ni a. Khawlaiah zu um ruak paih phal a ni lo va. Lo paih ta se a leitu kha awlsam taka chhui chhuah mai theih a ni. Zu in phalna hmunah pawh dress code an pawm loh chuan luh an phal lo a ni awm e. 

Meizial erawh a zalen viau a, khawlaiah chuan a zuk theih deuh vek mai. Hetih lai hian India rama kan uar tak, Gutkha Product chi ho reng reng khap tlat a ni thung. Muslim dan kalha inchei/inbel leh chhan engemaw avanga stadium atanga security ten an chhuahtir hial te pawh social media lamah kan hmuh kha Qatar ram dinhmun tichiangtu a ni. World Cup hmun dangah hetiang thil thleng hi hriat tur a vang hle. 

T-SHIRT VANGA BUAINA    Keini group hi mi 12 kan ni a, ticket leh thil dang fel sa veka kal kan ni. Kan match en tur ni a lo thlen chuan phur takin kan kal a. Hotel atangin T-shirt inang thap kan ha a, mahse security hovin kan T-shirt hak chu phal loh a nih thu min hrilh a. Min khalh khawm a, kan T-shirt hmaa thu leh logo inziakte chu thla an la a, an hotute hnenah an thawn a. Kan T-shirt hak chu kan thlak lo a nih chuan stadium chhungah luh an phal lo bur! A thenin jacket te hak hnanin a thenin a letling zawng ten an ha bawk a, buai lutuk lovin kan insiamrem thei hram! 

QATAR POLICE OFFICER KA NGAM LO    T-shirt vanga security check-ah buaina kan chinfel hnuah buaina dang ka la tawk leh cheu! Mizoram atanga ka ken, Kuhva hlui tawh, silfai chawp ngai, sen chel chual tawh chu Cocaine/Opium chi khat emaw an ti a ni chek ang! An han en thin, mak an ti kher mai. Russia World Cup-ah kha chuan Stadium chhungah zalen takin Kuhva ka ei vei nen, Qatar-ah chuan security ten ralpui phiarin min phiar a ni mai si!

Security pa chuan min hruai kual min hruai kual a, an pu ber (officer) hnenah ‘ka kut ka sil e’ tiin a hnenah min thlen ta. Ram 20 chuanga lo zin ve tawh ka ni a, Air, Land, Port security te vawi za tam ka lo paltlang tawh. Heti teh chiama kuhva buaipui ka la tawng chhin lo! 

Rei fe hnuah chuan Qatar Police Officer chuan, ‘Tawngkam khat pawh i sawi leh chuan ka man ang che, tawngkam khat chauh pawh.. (If you talk only a single word, I will catch you. Only a single word…)” a ti ta. Hemi hmaa kan indawr dan leh thil thlen zel dante chu ngaihnawm tham tak tarlan tur a awm! Qatar jail a tan ka hlat lo tih ka hria, ngawih ka chuh ta. Qatar Police Officer ka ngam ta lo a nih chu! 

QATAR-AH PAWH KUHVA AN BUAIPUI!    Mizoramah Kuhva ro leh a hring kan buaipui a. Tarlan tawh angin Qatar-ah pawh Kuhva bawk an lo buaipui ve tho a nih chu! Mizoramah kuhva kan hre lutuk a, kan buaipui. Qatar ramah ve thung chuan Kuhva an hriat ve loh lutuk avangin Stadium Security ten Kuhva an hmuhin an buai ve thung! Ka thiante zingah pawh kuhva avanga darkar chanve dawn hnua insawifiah thei hram te an awm ve. Tun hnaia Stadium chhunga Mizo kuhva ei video viral pawh kha kan group zinga mi an ni a, stadium security-a kuhva an buaipui dan leh an rinhlelh dan hriat chuan stadium chhunga kuhva ei phak kha chu hlu hleuh hleuh tak a ni ringawt mai!

RUSSIA WORLD CUP VS QATAR WORLD CUP    Qatar hi ram te reuhte mah ni se Per Capita Income atanga chhut chuan khawvel ram hausa ber te zingah an tel pha hial. World Cup an thlenna tura inbuatsaihna senso pawh 200 billion chuang a ni. Sawiselna nasa kara thleng an ni bawk a, a inbuatsaihna a tha hle. Chutih rualin mihring nuai 10 chuang thleng tur chuan hotel an neihin a zo meuh lo, Qatar World Cup kalna senso hi fans te tan a sang viau mai. Mikhual dawngsawng turin manpower an neihin a daih bawk si lo, hlawhfa ruaiin World Cup an thleng a ni ber!

Russia-a World Cup Russia nghah a nih tum kha chuan anni chu ram hausa leh ram ropui an ni a, hneh takin anmahni ngeiin an kalpui deuh vek thei. Security tha tak hnuaiah fans te pawh an zalen viauin ka hria. Ram lian leh ropui an ni a, hotel lamah harsatna a awm lem lo va, senso pawh Qatar nena khaikhin chuan a hniam hle zawk bawk. 

THUNAWI DANG    Doha kan thlenna Hotel hi Five Star Hotel a ni a, kan hotel-ah hian Costa Rica Football Team te an thleng ve a. Hei vang hian kan thlenna Hotel luh leh chhuah kawngah security an uluk zual hle. Luhka pangngai-a luh phalsak kan ni lo va, kan cham chhung zawngin a hnung lama luhnaah chauh luh min phalsak. Kan lut chhuak zing ve si a, security ten Room Key min dil deuh ziah phei chu ninawm ve duh tak a ni! Costa Rica Team te hian Japan laka hnehna an chan tum khan kan hotel lamah chuan an thawm a tha hle.

Qatar World Cup-a slogan (metro theme) lar tak pakhat chu, ‘Metro, this way, this way metroooo…’ tih hi a ni. Stadium chhungah pawh an sawi rual dual dual hial a nih kha. Volunteers ten Fans te Metro station panna kawng an kawhhmuhna tawngkam lar em em a ni.

Mak tak mai chu Argentina Match ticket hi hralh kal berte zinga mi leh chan har berte zinga mi a ni. Messi ngaisangtu an tam vang a ni mai thei. 

Germany leh Spain Match kan en tum hian India FIFA Match Hospitality partner, CEO, Mr. Shyam Kartikeya chuan Hotel atangin Stadium thleng kan group te hi a hruai lut a, a hlu dangdang hle. 

Mizote hi Football ngaina tak kan nih rualin World Cup en tum leh a ngaihven hi kan tam lo ang reng hle. Kumina World Cup a hmuna en pawh hi keini group hi mi 12 kan ni a, a bak hi engzat chiah nge hre thei lo mah ila kan tam lem lo hle niin a lang. Thenkhat lahin World Cup tan tawh hnuah ticket ngaihtuahsak turin min lo ti ve bawk a, a tlai lua deuh a ni e!

Doha Airport kan thlen hlimin Manipur atanga World Cup en tum mi pakhat nen kan titi dun a. Ani hian Match 3 ticket a lo nei a. Manipur atanga World Cup en tum zat a sawi chu mi 200-300 inkar an nih rin thu a sawi. Football ngainatu leh ngaina lem lo tan pawh World Cup aia events lian leh ropui hi a awm kher lo vang. Chuvangin, hetiang event ropui tak atang hian zir tur tam tak a awm a, Mizote hi khawvel tukverhah hian dak ila. Mi tam zawkin en tum ila ka duh hle. Khawhawi a zau chuan rilru pawh a zau deuh nge nge a nia!

World Cup hi tum 2 ka chhimna a lo ni ve ta a. Ram hrang hrang, hnam hrang hrangte lungrual taka Stadium leh Fan Festival vela kan kal khawm a, hlim taka hun kan hmangho te hi a hluin a ropui ka ti kher mai. 

VANRAM KAWTCHHUAH    Vanram hian kawtchhuah a nei em ka hre chiah lo! Mahse, World Cup en turin rethei, hausa, hmelchhia leh tha, mingo, mi dum, ram leh hnam hrang hrang, mel sang tam tak atangin naupang, nula leh tlangval, pitar leh putar chenin Stadium panin kan kal khawm a. Pengthuam hrang hrang atanga hlim tak leh lungrual taka Stadium eng ut leh music ri ruai ruai pana mi sang tel kan pung khawm tup tup mai han hmuh chuan a hlimawm tak zet a, World Cup ropuizia a tarlang a, ‘Vanram Kawtchhuah’ ni hiala mawi leh ropui a ni!

World Cup i en mek lai hian hei hi lo mitthla tel la, stadium ropui tak chhungah mi sing 4-5 an thu khat hmur a, khuaipui bu ang maiin an thum chur chur a. Chutih rualin ticket nei lem lo va stadium leh a chhehvela hawkdak vanga lo tei suau suau mi sang tam tak an awm tih hre tel bawk ang che. 

Chu mai a la ni lo, Fan Festival-ah match awm laiin Football fans mi sing 2-3 tel hlim takin an haw haw dur dur reng bawk. World Cup lai hian Doha khawpuiah chuan zan reh awm mang lo khawpin fans tam takin hun an hmang mek tih hria la, ngaihlu takin FIFA World Cup 2022 hi lo thlir zel mai rawh.

Share now