Aizawl August 20, 2024 : Mizo film industry-in kawng hrang hrangin hma a sawn a, hmun danga an tih thinte pawh kan tual zawlah chhim tur a awm ve mek zel. Hmun danga film festival lian leh ropui tak takte neih a lo ni thin a, Mizoram-ah pawh 'Film Fest 2024' buatsaih a ni dawn.

Film hmasawnna kawnga hmalakna kalpui mektu Entertainment Society of Mizoram (ESM) leh Information & Public Relation Department tangkawpte chuan November thla hian Film Fest an buatsaih dawn - a vawi khatna tur a ni hial mai thei.

Inbuatsaihna pawh ngawrh taka kalpui mek niin, Mizo Film Award nen kal kawp tura ruahman a ni. Film Fest 2024 neih hmasak a ni ang a, a tawp khar nan Mizo Film Award sem a ni ang.

Mizo Film Award hi kum 2021 atang khan hlawhtling taka sem tan a lo ni tawh a, kuminah pawh Entertainment Society of Mizoram (ESM) bultumin sem leh a ni ang. Tun tumah hian September 2023 atanga October 2024 inkara film chhuakte a huam dawn a ni.