Mizoram sawrkar chuan lirthei tlan velte an him zawkna atan fimkhurna hapta a hmang leh dawn a, kumin thupui atan hian ‘Lamliana himna hi nun himna a ni’ tih chu hman tum a ni a, kumin kan thupui ang ngei hian hun himna hi ngai pawimawh lehzual thei ila a tha hle ang.

Fimkhurna hapta hi Aizawl leh khawpui hrang hrangahte hawn thin a ni a, a lawmawm viau rual hian a hawn ni bak hi kan ngaihsak tawk lo deuh em aw a tih theih a. Chu mai piah lamah hapta kan hman chhung bak hi chu sawrkar lam pawh hian kan hre zui tawk lo deuh niin a lang a, hei hian lirthei khalhtute ah inthlahdahna a siam thin avangin a kenkawh kawngah kumtluana hmalak theih nise a duhawm hle mai.

Kan rama lirthei chetsual chhan tam ber hi chu fimkhur loh vang a ni a, driver te hi fimkhur sela chuan lirthei chetsualna tam ber hi chu kan pumpelh theih a rinawm. Kan rama lirthei khalhtute zingah state dang licence nei eng emaw zat an awm niin an sawi a, state thenkhatah hi chuan license te hi lei mai theihin a awm nia sawite a awm avangin heng mite hi lirthei khalh turin an tling tawk tak zet em tih enfiah leh theih nise a duhawm hle mai.

Zu leh ruihtheih thil dangte hi lirthei chetsualna thlentu lian an nih avangin hemi kawngah pawh hian Excise, Police leh Transport thuneitute an tanrual thiam a pawimawh hle mai a. Rui chunga motor khalh an awm chuan an license tihtawp emaw, hun eng emaw chen hrensak emaw ni ta se, license an dil lehna turah pawh dan ang taka hmalak chhunzawm zel a nih chuan driver-teah pawh fimkhurna a awm lehzualin a rinawm. Mipuite pawh hian kawng hnaih lutuka in kan sak thin hi sim a tha a, hei mai bakah kawngkama insakna hmanrua leh thil dang kan dah thin pawh hi kan senghawi a tha khawp mai.

Kumtluana kan kalpui thei lo a nih pawhin fimkhurna hapta kan hman chhung na na na hi chuan dan leh hrai zawm lo te uluk taka dapin hrem ngei nise, chu mai bakah dan bawhchhiate chu na taka hrem ngei ni ta se. Traffic police-te pawhin khauh lehzualin traffic rules hi kengkawh se. Driver leh mipui (passenger) te hriat tur leh tih tur pawh tun aia uar zawkin inzirtir nise chetsualna eng emaw zat hi chu kan pumpelh theih a beiseiawm e.