Hollywood movie hit ni mek, ‘Black Widow’-a a changtu pakhat zawk, English lemchang thiam, Florence Pugh-i hi January 3, 1996 khan Oxford-a piang a ni.

A nu, Deborah hi lâm thiam a ni a, a pa, Clinton Pugh erawh thingpui dawr neitu (restaurateur) a ni a, unau pathum a nei a. a unaute pawh an pangngai hlawm hle.

Toby Sebastian chu lemchang thiam niin musician a ni bawk a, Arabella Gibbins-i pawh lemchang thiam a ni a, Rafaela ‘Raffie’ Pugh pawh a ni tho bawk.

A naupan lai hian a hrisel lo ve thin hle a, tracheomalacia neiin damdawi inah a lut ve fo thin.

Kum thum mi lek a nih laiin an chhungkuain Sotogrande, Spain-ah an pem a, an pem chhan pawh hi khaw lum deuhvah Pugh-i hriselna dinhmun chu a ziaawm an beisei vang a ni.

Spain-ah hian kum ruk a nih thleng chengin Oxford-ah bawk an kir leh a. Kum ruk mi lek a nih lai hian Pugh-i hi an sikulah Mary lemah changin an chantir chhan hi Yorkshire lam chhuak saptawng a hman vang a ni.

A hriselna dinhmun avangin sikul pangngaiah kal lovin Wychwood School leh St Edward’s School, Oxford hnuaiah inah lehkha an zirtir a; mahse, a zirte hian lemchan lama kal zel tumna lamah a pui lo hle niin a hre thin.

A tum ang ngeiin lemchan lamah a lut a, kum 2014 khan drama film pakhat, ‘The Falling’-ah a inlan ve ta a, hriat a hlawh phah lutuk lem lo va. Kum 2015-ah erawh Pugh-i chuan mi hmelhriat a hlawh ve tan ta a. Independent drama ‘Lady Macbeth’-ah a changtunu ber niin mo thinchhe tak lema chan chu a thiam hle a, British Independent Film Award a dawn phah hial a ni.

Kum 2018 khan ‘King Lear’ leh ‘Outlaw King’ a chang leh a, hemi kum vek hian miniseries ‘The Little Drummer Girl’ a chan thiam em avangin fak a hlawh hle bawk a. BAFTA Rising Star Award dawng tura chhawp chhuah hial a ni.

UK velah chuan hriat hlawh hle tawh mah se khawvel hriat a hlawhna erawh kum 2019-a professional wrestler Paige-i lema a chan a\angin a ni a. Biographical sports film ‘Fighting with My Family’-ah Paige-i lemah hian a chang a, horror film ‘Midsommar’-ah inlan leh period drama ‘Little Women’ a chang leh bawk a. Academy Award leh BAFTA Award dawng tura chhawp chhuah a ni ta hial a ni.