ZALEN January 27, 2025 : Vawiin khan MZP General Headquarters hruaitute leh Mizoram Governor General (Dr) Vijay Kumar Singh, PVSM, AVSM, YSM (Retd) chu a pisa Raj Bhavan, Aizawl-ah an inkawm a. FMR chunchanga an ngaihdan te an hrilh bakah Union Home Minister hnena thawn tur lehkha an hlan nghal.

MZP chuan Governor hnenah hian, Free Movement Regime (FMR) leh Border Fencing chungchanga MZP ngaihdan an hrilh a. Hnam khat, chi khat, unau ramriin a thendarh te insuihkhâwm hi MZP hmathlir a nih mek laia, zalen taka inkalpawhna tih tawp a ni leh ramri hung tumna MZP in a duh loh thu an hrilh. Theih ang anga hma lak pui tura Governor chu ngenin, Union Home Minister hnena hemi chungchanga MZP lehkha thawn tur an hlan nghal.

MZP chuan, Mizo zirlaite tan Study tour buatsaih sak turin Governor hi an ngen a. Railway hnuaia hna ruakah Mizo zirlai a tam thei ang ber an luh theih nan, exam Center Mizoram-ah dah a nih theih nana hmalak sak turin an ngen bawk.

Governor chuan, MZP ten zirlaite hmakhua ngaia a hnena an thil thlente chu theih ang anga a bawhzui tur thu a sawi a. Kawng hrang hrangah thawhpui tura lo sawmin, Zirlaite ruihhlo laka an fihlîm theih nan theihtawp a hmala turin a lo fuih a. Hemi kawnga an hmalaknaah chuan, a mah pawh a in hawn hle tur thu a sawi a. Mizoram a ruihhlo hluar lutuk a vei thu MZP hruaitute a lo hrilh a ni.