Republic Veng leh football hian inzawmna thuk tak a lo nei tawh thin a, tun hnai chhovah pawh Mizoram leh India club thaa player thawhhlawk ber pawl an ni.

An hming an lo chher tawhna hi chhawm nun zel tumin Republic Veng Games & Sports Association (RGSA) chuan naupangte tan an field-ah grassroot football academy an din a, thangtharte hnenah hlan chhawn zel an tum hle.

Kum 1990 chhova Mizo footballer lar ber zinga mi, ‘Khualpatea’ tia hriat lar chawr chhuahna leh sei lenna veng hian June 17 atanga ball pet zirna an kalpui tanah hian coach licence nei pahnih bakah trainer eng emaw zatn naupangte zirtir mek.

Anni bakah hian football-a mi hlawhtling leh hmingtha, Indian Super League leh I-League club-a khel tawhten hun an hmanpui thin bawk.

An zirlaite hi zirtir ngawr ngawr an tum lo va, pho chhuahna tur remchang awm ang angah chuan RGSA hminga teltira zau leh thui zawk an dai theihna tura hun tha awmah inlanpui zel an tum bawk.

RGSA Grassroot Football Academy hi mi pawhin an hlut a, tunah hian naupang 147 an inziak lut tawh a, inziah luh hun an la hawng reng a, dilna la chhuak tawh nen chuan mi 160 chuang an ni tawh. 

Zirlai an ngah avang hian an field pawhin a zo lo va, hei vang hian kum bithliah an siam a, kartluana inkal chhawk turin ruahmanna an siam a ngai hial.

Football zirna hi naupangte zirna tibuai lo turin, Thawhtanni atanga Inrinni inkarah zing dar 6:00-ah tanin dar 7:00-ah an bâng a. Inrinni bikah erawh tlai lamah an ti ve thung.

Cone 20, marker 20 leh speed ladder pahnih bakah ball pahnih chiah neia academy bul tan ni mah se an hruaituten theihtawp an chhuah a, an branch YMA leh mi tlawmngaite zarah zirna an kalpui mek zel. 

Mizorama football inelna ngaihhlut hlawh bera chhal ngam, YMA branch-te inelnaa kum 2005-a thiam ber nihna lo hauh tawh, Republic Veng hian tunah pawh Mizorama footbal league sang ber, Mizoram Premier League leh I-League-a khel player thahnem tak an kawl mek.

Nikuma inter-village tournament-ah pawh khan a thiam pariat zingah telin champion, Champhai Kanan an hneh lo va. Kumina YMA inelnaah pawh khan branch 140 chuang zingah a thiam branch 16 zingah an tel leh bawk a, an veng leh football sawi zawm hi a inhmeh hle a ni.