Heading (lu hmanga ball tauh) hi skill ngai tak mai a ni a, zuan san piah lamah a hun taka chetlak (timing) hi a pawimawh em em a ni. Ball hi goal bulah chuan a kang a a kalve nasat thin avangin, ball pet thiam mai bakah tauh thiam player te chu an hlu zual hle thin. 

Defender thenkhat hi chu an ball tauh thim avang hian goal ven him kawnga an thawh hlawk ang bawkin goal khungtu pawimawh an ni thei a, chutiang min chu centre-back zingah hian an awm nual nghe nghe. 

Tunlai footballer zinga lu hmanga ball tauh thiam ber ber panga te chu:

#5 Virgil van Dijk (Liverpool)
    Virgil van Dijk hi defenender niin goal ven kawngah a thawh hlawk hle a, amah a pa lian bawk nen a lu hmangin an lama goal tur tam tak a dan thin bakah goal a tauh lut nual tawh. 
    Liverpool tana mi tangkai feet 6.4” bawr a sang Van Dijk hi hliam vangin  season liam ta chhung khan a khel tam lova, 2019-20 season khan kum 30 mi hian goal nga lai a lu hmangin a tauh lut thei a ni. 

#4 Sergio Ramos (Real Madrid)
    Tun generation-a defender goal thun thei ber pakhat Sergio Ramos hian tun hnai khan a ropuina club Real Madrid chhuahsanin PSG a zawm.  Spanish international, defender ralhrat hian a lu hmangin goal 3 chauh la thun mahse, an lama goal ngei tur a ngaih a lu hmanga a ven erawh a tam tawh hle thung. A zuan sang bakah a timing a fuh thin vangin ball kang a tauh fuh thei em em a ni. 

#3 Robert Lewandowski (Bayern Munich)
    Robert Lewandowski hi tunlai striker tha leh goal thun thei ber zing ami a ni a, goal thun tur hian a ke bakah a lu a hmang thiam tel leh zel hi a hlauhawmna chu a ni. Kum 32 mi hian a ke pahnih a hman thiam bakah a lu a hmang thiam em em a, dribbling skill bakah position a la fuh thei hle bawk. Lewandowski hian season liam ta khan a lu hmangin goal 7 zet a thun thei. 

#2 Edinson Cavani (Manchester United)
    Manchester United a lut ta Edinson Cavani hi box chhungah chuan premier league striker hlauhawm ber pawl a ni a, ball kangah phei chuan a ni aia hlauhawm an awm bik lo. Uruguayan international centre-forward hian nikum khan a lu hmangin goal 7 a tauh lut a, chumi awmzia chu a goal thun zawng zawng 17 chanve thuak chu a tauh luh tihna a ni. 

#1 Cristiano Ronaldo (Juventus) 127
    Ram tana goal thun tam ber Cristiano Ronaldo hi leh lam pawl defender te tana player hmachhawn chakawm loh ber a ni hial ang. A inkhelh thiam leh a tlan chak piahlamah hian a ke pahnih a hmang thiam em em a, a lu a la hmang thiam tel leh zel. 
    A lu hmangin goal 127 zet thun tawhin a ke hman thiam loh zawk a ke vei lam hmangin goal 129 zet a chhuih lut tawh bawk.