Ralthuam hmanga ram leh ram indo ulh ulh kan bansan chho hret hret a,   infiamna hmangin khelmual chhungah ram leh ram in epna a sosang tulh tulh thung. Ralthuam hmanga chungnunna lantir thin ram ten an nawm-anmakin an chakna an phochhuak thei tawh lova, chuvangin infiamna hmanga hmelma te diriam theihna kawng tha leh awlsam ber pakhat chu sport alo ni ta. 

Infiamna huangah rau rau pawh, ram zawng zawng deuhthawina an khel football hmanga phuba lakna chu a run lehzual bik awm e! 

Hetia, khawvelin football a ngaihhlut avang hian,  football player te tan chuan ram tana khel phak nih chu inchhuanna tham a tling a,  ngaihsan leh chawimawi an hlawh awllo. Chak tura pawimawh ber goal thun thei te phei chu hnam pasaltha anni hawt mai.

Ram tana goal thun hnem mi pathum te chu: 

Ali Daei: March ni 21, 1969 a piang Iranian professional footballer hi Iran national football team captain thin niin club lamah Bundesliga team Arminia Bielefeld, Bayern Munich leh Hertha Berlin-ah te a kel thin.     

Forward pa sang feet 6 leh inches 4 zet Daei hian goal thun nan a lu a hmang tangkai hle. International football-a goal thun tam ber niin game 149 a khelhah goal 109 zet thunin Guinness World Record-ah a lang vang. 

UNICEF Goodwill Ambassador atan 2001 khan Daei hi ruat niin Asian Football Hall of Fame-ah ziah luh a ni tawh bawk. 

Cristiano Ronaldo: A hming pum chu Cristiano Ronaldo dos Santos Aveiro niin February ni 5, 1985 khan Funchal, Madeira, Portugal-ah a piang. Feet 6 inches 2 zeta sang niin khawvel footballer ropui ber zinga chhiar hmaih tawh loh tur a ni. 

Club tan Sporting CP, Manchester United leh Real Madrid tan a khel kual tawh a, tunah hian Juventus tan a khel mek. 

Ronaldo hi World Cup-a hat-trick a siam thei upa ber niin mimal chawimawina sang ber Ballon d'Or award tum 5 a dawng tawh a, European Golden Shoe award tum 4 dawng tawhin, major trophy 31 zet a chawi tawh bawk. UEFA Champions League-ah goal 134 leh assist 42 neiin record a chelh mek bawk. Ram tan goal 104 thun tawhin ala thun belh mek zel bawk. 

Ferenc Puskás: Hungarian Ferenc Puskás hming chawi hian FIFA chuan goal mawi ber award a siam hial. April ni 1, 1927 khan Budapest, Hungary-ah piangin Budapest Honvéd leh Real Madrid tan a khel thin. Ram tan Hungary leh Spain tan khelin goal zet a thun a ni. 

Hungary ram tan hian international match 85-ah inlanin goal 84 zet a thun a, Spain tan goal a thun lo thung. Club hrang hrang tan tum 529 a inlanah goal 514 a thun a, 1952 Olympic-ah a ram champion pui a, 1954 World Cup-ah final a thlenpui bawk. European Cup-ah tum thum a champion bawk.