Ford Motor Company chuan India rama motor siam chhuah hna an thawh chu an tawp san dawn tih an puang a, plant an neih te pawh khar a nih tur thu an sawi.  

American company Ford hi India ramah chuan motor siam chhuaktu inbun hmasa pawl an ni a, 1994 khan bul an tan. Kum 27 zet a vei hnuah erawh India rama an car siam chhuah tihtawp zai an rel ve ta a ni. 

SUV ngainatute tan phei chu he chanchin hi a lungchhiat thlak hle a, hetih rual hian ram danga siam CBU model hrang hrang chu India ramah an chawkluh a ni dawn thung. 

Ford hian Sanand, Gujarat leh Maraimalai Nagar, Tamil Nadu-a an car siamna hmunpui plant te chu an khar dawn a, he lai hmun atanga ram danga car an thawn chhuah thin pawh an titawp dawn a ni. 

Sanand leh Maraimalai Nagar plant atang hian kumtin car 4,00,000 vel an siam chhuak thin a, tun hnaiah erawh 80,000 (20%) chauh an siam chhuak. A zat ve hi ram dangah an thawn chhuak a, tihtawp law law an tum ta a ni. 

Ford Motor Company president leh CEO ni bawk Jim Farley chuan, "Ford hian tun hnai kum 10 chhungin $2 billion vel zet kan hloh a, tum hma angin demand a sang tawk tawh lo bawk," tiin, tihtawp an duh chhan chu sum an hloh nasat vang a nih thu a sawi. 

An chhuak dawn lo
Ford hian India an chhuahsan pumhlum dawn lo a, car siam chhuahna plant an khar mai zawk dawn a ni. Company lam chuan engineering leh technology lamaha nasa zawka hma lak an tum a, motor engine tam zawk siam chhuak tura hmalak an tum thu an sawi. 

Ford hian an mahni puala car siam chhuak tawh loin company dangte nen thawkhoa lirthei siam chhuah an tum a, 2019 khan Mahindra & Mahindra te nen thawhhona thuthlung an lo ziak tawh nghe nghe. Mahse an deal hi December 2020 khan tihtawp leh nghal a ni a, an kal zel dan tur hi tun dinhmunah chuan sawi lawk a harsa ta hle. 

India hi Ford company-in hnathawk a dah tamna hmun niin, a hnathawkte tana hlawh a sen tam ber dawttuna a ni phak bawk. Mahse tun hnaia an thutlukna hian hna thawktu thahnem tak a nghawng dawn a, mi 4000 vel lai chuan an tuar dawn an tarlang. 

India-ah hian hnathawktu chhawr vak tawh loin ram dang atangin an car siam chhuahsan an chawlut tawh dawn a ni. Australia leh Brazil atangtein an lalut dawn nia tarlan a ni a, an model thenkhat - Mustang, Bronco, Electric Vehicle leh Ranger pickup te chu India-ah hian an lalut dawn a ni. Mustang bik hi chu India-ah tlangzarh thuai a nih tur thu puan a lo ni tawh bawk.