Aizawl July 8, 2022 : Zamuanga foreign Kuhva ro man, hal a nih avangin vawiin khan MJA Mamit te chuan a hmunah an kal chilh. Hachhek Bial Kuhva Chingtu Pawl (HBKCP) hruaituten lo dawng sawngin Lalzawna Pachuau, President, Zamuang Kuhva Chingtu Association chuan kum 2021-ah Kuhva atangin nuai 579 an thar chhuah thu leh kuminah hian nuai 600-700 vel thar chhuah an beisei thu a lo hrilh.

Zamuang khua te chuan May - June ah kuhva lei turin agreement ziah fel a ni thin an ti a, Zamuang Kuhva chingtute hian Agreement form siamin an pe chhuak thin thu leh tunah erawh foreign kuhva Mizoram atanga a luh reng avang avangin, Agreement siam pawh nuai 3 hnuailam bak a la awm lo niin an sawi a, "Nuai 3 chung lamah agreement siam a la ni thei lo a ni," an ti. 

Kanan Lalhlimawma, Asst Gen. Secretary, HBKCP chuan, "Foreign kuhva chu dan lova lo lut anih avangin Assam state-ah harsatna an tawk thin a, chu chuan kan kuhva thar chhuah a nghawng avangin a hralhna kawngah harsatna kan tawk a, hei vang hian foreign kuhva hi lo lut lo tawp se, India ram chhunga thar chhuah ngei kan kuhva te hi zalen taka a hma anga hralh a nih leh theih hi kan duh ber a ni," a ti.

HBKCP hnuaiah hian khaw 11-ah nikum khan cheng nuai  2741an thar chhuak a, kumin hian cheng nuai 3000 chuang lak luh beisei a nih mek laiin foreign kuhva a kal zel chuan an beisei hi a pha dawn lo niin an sawi.

1975 atangin Hachek bialah hian kuhva chin tan a ni a, huan neitute chuan Leitha (Fertilizer) an mamawh hle tih MJA te hi an lo hirlh a, kuhva phurh chhuahna tur link road tha leh a chawmna tur tui an mamawh thu an sawi bawk. Kuhva thar a tam avangin Zamuangah hian Soil Department hi tih len nise an ti bawk.