March 6, 2024; Environment, Forest & Climate Change Department Kolasib Division chuan dan lova lakluh Saphu kawr 98kgs leh a phurtu an man.

Kolasib DFO Margaret Lalramchhani hnen aṭanga Kolasib AW thudawn danin saphu kawr te hi phailam aṭanga Sumo service ML10B 6858 hmanga phurhluh a ni a, nimin zing dar 5:30 khan Vairengte Excise Checkgate-ah an bungrua te enfiah a nih hian saphu kawr an phur tih hriat a ni a, Forest department hotute hriattir an nih hnuah Excise department chuan Kolasib DFO Office thleng an rawn chhawm (escort) chho a ni.

Sumo khalhtu Daniala (29) s/o Ranjit, Salganga, Cachar chuan Shillong leh Aizawl inkar service ṭhin a nih thu leh a thilphurh te chu Happy Valley, Shillong-a Sumo counter aṭanga a phurh thu a sawi a, counter nghaktute hian vawksa sarep tia sawiin Aizawl sumo counter-a dah turin an hrilh niin a sawi. Driver chuan a hmain a ṭhian ten an bum tawh a, zu a lo phurh tawh vangin tun ṭumah hian Aizawl-ah court a ngaih vanga bungrua te chu rawn phur chho a nih thu a sawi a, saphu kawr bakah bungraw dang Sofa nen Rs. 6,000 hlawh turin a phur ta niin a sawi. A thilphurh chu vawksa rep tia an sawi bak engnge a nih hre turin a en lova, an bungrua phurh hrim hrim an en ngai lo tih a sawi bawk a ni.

Kolasib DFO chuan a ruka kuhva phurh hluar chuan kalkawng pawh a ti tam a, hei hian anmahni lam pawh harsatna a siam nasa tih a sawi. Ramdang aṭangin dan lova tawlhruk Burma teak te leh ramsa leh sava chi hrang hrangte a lo thleng leh nawlh ṭhin a ti a, tun ṭuma Saphu kawr an man chu a vaiin 98kgs a nih thu leh an hralhna rate-ah Kg khat Rs. 35,000 te a nih thu sawiin dan angin hma an la zui nghal dawn thu a sawi.