Aizawl November 12, 2022: Foundation for Drug-Free Mizoram High Council Vawi 2-na Synod Conference Centre, Mission Vengah vawiin khan neih a ni a, he hunah hian Lalruatkima, Minister I&PR chuan khuallian niin a hmanpui a, Foundation For Drug-Free Mizoram ten ruihhlo that lohzia inzirtirna (awareness) kawnga an hmalak thinna chu fakawm a tih thu a sawi.

Laruatkima chuan, Foundation For Drug-Free Mizoram ten ruihhlo that lohzia inzirtirna (awareness) kawnga an hmalak thinna chu fakawm a, Zirna In leh Sunday School ah te awareness programme nei a an chechhuak thin te, thalai singkhat zet hnena ruihhlo laka fihlim tura intiamna an neihpui thei a lawmawm hle, a ti. "Mizoram hi International Drug Traffic Route-a awm kan nih avangin ruihhlo in kan ram a tibuai nasa hle a, nasa takin min chimral mek zel a, chutiang kara ruihhlo dotu tur pawl te an lo chhuak zel hi a lawmawm. Mizoram sawrkarin theih tawp chhuahin ruihhlo a do thin a, chutih rualin sawrkar leh mipui inkarah thawh hona tha a pawimawh. NGO-ten ruihhlo do a hma inlaknaah theih tawp chuah zel turin ka ngen che u a ni,"  a ti.

Minister chuan, Ruihhlo dona kawngah hian sawrkar leh NGO te mai bakah hian Nu leh Pa ten mawhphurna sang tak an neih thu a sawi a, Drug-Free Mizoram hi a hlawhtlinna tur chuan chhungkuaah bul kan tan a ngai a ni. ‘Addict’ tih tawngkam kan hman apiangin ruihhlo lam ni lovin taimak leh hnathawh lam zawk he tawngkam hi kan kawhtir theihna turin tan kan lak zual zel a ngai a ni. Mizoramah hian addict te tan Home awm nualin, an hnawthawh ropui hle mahse heng De-addiction Home neih avang hian mipui te kan inthlahdah deuh thin niin a lang. Ruihhlo ngai te hi kan hnampui te, kan thisen zawmpuite an nih avangin hmangaih tak leh duat taka theihtawp chhuaha kan enkawl an mamawh tak zet a ni," a ti. I&PR Minister chuan chhungkua atanga bul kan tan that a zirtirna dik kan pek a, chu chu School leh Sunday school lamah zirtirna pek chhunzawm an nih chuan ruihhlo lakah hian kan tu leh fate kan venghim thei dawn a ni a, ti bawk.

Mizoram hi a chhe zawngin kan sawi fo a, ruihhlo tamna a ni kan ti thin a, a dikna chen pawh awm tho ,mahse mi tha leh fel tak tak Kohhran leh khawtlang tana theihtawp chhuah, an thiamna leh finna hmang tam tak an awm thu Minister chuan a sawi a. Kan ramin thatna lai kan neih te pawh hi sawi tam a hun tawh a, mi tha leh fel te chu kan Idol te an nih theihna turin kan inzirtir pawh a tul hle a ni, a ti . Social Media kan hman nasat thu leh, a bik takin thalaiten a tha lam aiin a chhe zawng atan an hmang uar niin a lang a, hei hian kan ‘moral value’ tam takin a tichhe mek nia a hriat thu sawi bawkin Minister chuan Social Media kan hmanna kawngah pawh zirtirna tha neih zel a tul a ti.

Foundation for Drug-Free Mizoram te chu an dinna rei lo hle mahse an member te inpekna avangin hlawhthlinna an hmu chho mek zel chu lawmawm a tih thu Minsiter chuan a sawi a, Mizoram thalai te ruihhlo laka an fihlimna tura an kalzelna turah duhsakna a hlan nghal bawk a ni.

Vawiina Foundation for Drug-Free Mizoram, High Council neih hi an Founding President Lalnunthara chuan a kaihruai a, General Secretary, C. Lanundika’n report peiin an member kal ta te sunna hun leh Life Member leh Patron Member thar te hnenah Certificate hlanna hun an nei nghal a ni.