Aizawl April 8, 2024 : Sairang to Vairengte Four Lane Land Owner Association te chuan vawiin khan thuthar lakhawmtute Aizawl Press Club-ah an kawm a, Vairengte to Sairang four lane kawng kal tur hna tan thuai an duh tih an sawi a, Forest department lamin a contractor tur NHIDCL te phalna an pe thei lo chu an hriatthiam loh thu an sawi a, April 15 thleng sawkar nghah an tum a, a tul dan a zirin election boycott thlenga hmalak an tum.

He kawng laih tur hi Package 6 a then niin Package 3, 4, 5 leh 6 te hi Notification pawh chhuah tawh a ni a, Package 7&8 te hi chu notification tihchhuah a la ni lo thung. Vairengte to Kawnpui Package 3-6 te hi chu Forest Department in phalna an pek chuan laih mai theih a nih thu Sairang to Vairengte Four Lane Land Owner Association te chuan an sawi.

Forest Department chuan a tirah chuan he kawng laih hi Road Reserve Forest (RRF) leh Riverine Reserved Forest (RRF) in a huam tiin kawng laih tum hi a dodal a, High Court Single Bench chuan Forest te dodalna hi an hnawl sak a, hemi hnu hian NGO pakhat chuan High Court-ah hian appeal nawn lehin enge maw chan chu 'Status Quo' ah dah a ni a, mahse, anni hi an inhnuhdawh leh hnuah High Court Principal Bench chuan January 22, 2021 khan Court thutlukna hmasa chu a nemnghet leh a ni.

Cabinet Meeting, Enforcement committee leh sawrkar chuan High Court thu ang hian kal tur tih chu an thutlukna a ni. Forest Department hian Thing kih phalna te pawh notification an tichhuak tawh a, chutihrualin laih phalna hi an pe duh si lo a ni. Sairang to Vairengte Four Lane Land Owner Association chuan Forest Department chhungah hian thil fel lo awma an ngaih thu an sawi.

Sairang to Vairengte Four Lane Land Owner Association chuan tunah hian kawng laihin a tihbuai tur chhungkaw 1700 chuang kan awm an ti a, an harsatna te sawrkarin chinfel sak thuai se an duh tih an sawi bawk.