French Open 2021 kan nghak chhuak ta

Admin - May 30, 2021

Rafael Nadal chuan a tum 14-na turin French Open title lak a beisei | Serena Williams chuan a Grand slam title tum 24-na tur a beisei ve thung

French Open 2021 chu vawiin May ni 30 atangin Paris, France-ah tan a ni dawn ta. He tournament draw pawh neih fel ni tawhin Rafael Nadal chuan a tum 14-na turin French Open title lak a beisei dawn a, hmeichhe lamah Serena Williams chuan a Grand slam title tum 24-na tur a beisei ve thung ang. 

Tun hnaiah a, vawi 12 nana Barcelona Open title leh Italian Open title tum 10 na a lak vangin Nadal hian inrintawkna a neih belh nasa hlein a rinawm. Hetih rual hian vei vuak Nadal hian Monte Carlo leh Madrid lamah erawh beisei a phak lo hle thung a nih kha. 

Roland Garros-a tum 13 zet champion tawh Rafael Naldal hi tun tumah hian seeded pathumna a ni phak hram a, Paris clay-a la champion ngailo world number 2 Daniil Medvedev-a hnuaiah a awm. Hei mai bakah hian draw-ah Novak Djokovic leh Roger Federer-a te nen final hmaa intum theiin Spaniard clay lalpa hi an awm ho a ni. 

Champion tur inrinsiak naah Naldal-a hming hi langsar viau mahse, nomawi chawi thang Novak Djokovic, Alexander Zverev, Stafanos Tsitsipas, Andrey Rublev, Daniil Medvedev leh Dominic Thiem te an tel ve dawn avangin tu berin nge title la ang tih erawh a la chiang thei lo thung.  Anni bakah hian Grand Slam tum 20 champion tawh Roger Federer ala awm cheu. 

Roland Garros pawh fans tam zawkin an en theih beiseina nen kar khat zeta sawn hlat a ni. Boruak tha tak hnuaiah an khel thei dawna a lan tak avang hian mipui tam zawk mit chu "Clay lalpa" Rafael Nadal-a chungah a fu tih a ngam  hial awm e. Roland Garros-ah hian a champion leh a nih chuan a vawi nga chak zawnna tur chiah a ni bawk ang. Tin, tun tumah hian a champion hlauh a nih chuan Grand Slam men's single title tum 20 champion tawh Roger Federer a lehpel thei dawn chiah bawk a ni. 

Tun tum tournament-ah hian Nadal hi seeded pathumna niin seed pariatna Federer-a nen semi-final lamah an intawng thei a. Mahse, hei aia huphurhawm erawh Federer-a'n quarter-final-a a hma chhawn tur world No. 1 Novak Djokovic hi a rawn tlang zawk a nih hlauh chuan an inhmachhawn a ngai dawn a ni. Tennis lama "Big Three" te hi draw naah hmun khatah an awm ho a ni. 

Hmeichhe lamah chuan world No. 1 leh kum 2019 champion Ash Barty chu Covid-19 hripui leng vanga tournament a inlan loh hnuah a hmasa ber atan a rawn inlan leh tan tawh dawn a ni. Champion lai Barty bakah Iga Swiatek, Coco Gauff, Sofia Kenin leh Jennifer Brady te an awmho bawk. 

Serena Williams hi champion tura rinkai chu ni chiah lo mahse, history siam thei turin theihna ala nei reng a ni. Ani hi Grand Slam singles title tum 24 la tawh Margaret Court-i record khumin William hian Roland Garros-ah tum thum a champion tawh a ni. Mahse, a champion hnuhnung ber erawh kum 2015 daih a ni tawh thung. 

Share now