ZALEN September 18, 2024 : Khawvel a changkang zel a, ram tinin ei leh in hrisel, fai leh taksa ngeih zawngte an ngai pawimawh chho zel a. Ei tur tui leh thianghlim chu inelna niin ram hrang hrangin khualzinte hip nan hman an tum thin a ni. Hetia ei tur thianghlim buaipui a nih lai hian Food Safety & Standards Authority of India (FSSAI) report chuan Mizoram chu India rama state tê zingah ei tur thianghlim lo ber state-ah a puang.

FSSAI hian tehna chi hrang hrang chi nga hmangin India ram chhunga state lian, state tenau leh UT te chua a teh a. State lian zingah hian 20 awmin chungte chu Andhra Pradesh, Assam, Bihar, Chhattisgarh, Gujarat, Haryana, Himachal Pradesh, Jharkhand, Karnataka, Kerala, Madhya Pradesh, Maharashtra, Odisha, Punjab, Rajasthan, Tamil Nadu, Telangana, Uttar Pradesh, Uttarakhand leh West Bengal te an ni a. State tê-ah pariat awmin chungte chu Arunachal Pradesh, Goa, Manipur, Meghalaya, Mizoram, Nagaland, Sikkim leh Tripura te niin UT-ah Andaman & Nicobar Islands, Chandigarh, Dadra & Nagar Haveli, Daman & Diu, National Capital Territory of Delhi, Jammu & Kashmir, Lakshadweep, Ladakh leh Puducherry te an ni.

Tehna hrang hrang hmanga teh a nih hnuah state lianah hian Kerela chuan mark hmu sang berin 63 a hmu a, UT-ah J&K sang berin 59.9 a hmu a, state tê zingah Goa chu sang berin 51 a hmu a. Hetih lai hian a hniam ber, Mizoram chuan 14.5 a hmu a ni.

Mizoram Food & Drug Administration (FDA), Health & Family Welfare Department chuan Mizoram Score 14.5 chungchang leh Food Safety Index point inpek dan an sawifiah a. Food Safety Index hi ei/in thianghlim leh thianghlim loh tehna ngawr ngawr a ni lo tiin, point hmuh a hniam avanga kan ei/in quality chhe ta hluah hluah anga ngaih tur a ni lo an ti a. State dinhmun a zir zelin point hmuh mai loh theihna tur thil tam tak a awm niin an sawi.

“FSSAI hnuaia Food Safety Auditor-ten Aizawla hotel leh restaurant-te audit (hygiene rating) an rawn neihah chuan 5 star leh 4 star hmu pha an awm fur a, hei hian a tak takah chuan kan food standards a hniam bik lohzia a lantir a ni,” an ti.

FDA-in tehna hrang hrang hmanga Mizoram hniam chhan an sawi zingah Mizoramah Food Safety thawktu (manpower) kan tlem a, FSSAI-in kan neih zat tura min chhutsak kan pha lo nasa a, hetah mai pawh hian point hmuh ngaihna a awm lo.

Central Advisory Committee-a tel turten meeting an tel remchang lo va. Chu bakah State Level Meeting leh District Level Meeting pawh kum kalta khan neih a ni lo bawk a, hengahte hian Mizoramin point a hmu lo.

Nikum Work Plan pawisa dawn har avangin food sample test turin draw hman a ni lo va, food licensing camp neih a ni lo va. Eat Right Initiatives hi sum dawn loh avangin hma lak a ni lo va, point pu vek an ni.

Court-ah emaw. Adjudicating Officer hnenah emaw case register a ni lo bawk a, hei hi food sample test result azira tih tur a ni a. Legal sample draw a nih loh avangin point hmuh ngaihna a awm lo a. Danin appelate tribunal neih a phut bawk a, hemi a la neih loh avangin point kan hmu lo, tihte a ni.