ZALEN, August 12, 2025: Youth Icon star Fuhchiangtea’n lengzem khawvel a thlah nana music video a tihchhuah chuan ni nga chhungin YouTube-ah thlirtu maktaduai a nei tling leh ta.

Tuidam tlangval, J. Lalrosanga hian lengzem khawvel chu ‘A mawi ber’ tih music video hmanga mangtha nan Ningani zan dar 08:00 pelh hret khan YouTube-ah a tichhuak.

Rsa hian nikum kum tawp lama Youth Icon intihsiak laia a hla hman thiam leh a zai ngainatuten ‘Fuhchiangtea’ an tih phahna, thla sarih kaltaa ‘Fuh chiang lo maw?’ music video a tihchhuah hnua official music video a tihchhuah leh hmasak ber hian Thawhlehni zan khan thlirtu maktaduai a nei tling leh ta der a ni.

A music video hmasa zawk kha ni hnih tling lo hret chhungin thlirtu maktaduai a lo nei tling tawh a, tunah hian maktaduai 4.1 chuangin an thlir tawh.

Lengzem khawvel thlah nana a hman, ‘A mawi ber’ hi Lalngaisanga (L), Tuidam phuah a ni a. A music leh aw hi live-a recording-in recording studio lun tak, Kings & Prophets studio-ah record a ni.

US-a hun hmang mek Rsa hian ‘A mawi ber’ video hi a zinnaa a siam a ni a, a model pawh USA-a Mizo hnahthlak awm, Nicole Malsawmsangi a ni.