Aizawl: India-in G-20 Presidency dinhmun a chelh chhunga G20 meeting peng hrang hrang a thlen tura inbuatsaihna kal mekah 9.12.2022 tlai khan Prime Minister Narendra Modi chuan state leh UT tin governor/ Lt. General leh chief minister te video conference a neihpui a. Mizoram Chief Minister Zoramthanga pawh a tel.

Prime Minister chuan state tin thawhhona a pawimawh thu sawiin, G20 Presidency India-in a chelh chhung hian khawvel hmuhah ram hmasawnna leh ropuinate phochhuahna hun tha a ni tih hriain, mi tin lungrual leh thahnemngai taka thawhho pawimawhna a sawi.

State hrang hrang mawina leh potential-te pho lan nan India ram khawpui hrang hranga meeting hmun ruahman a nih dan sawiin, state tinten an theihna lo pho chhuaka hmasawnna remchangah an hman ngei a beisei thu a sawi.

Mizoram chu March, 2023-ah B20 meeting thleng tura ruahman a ni a. He multilateral business partnership session hi insumdawntawnna leh thawhhona chungchang sawihona niin, bamboo/ horticulture, handloom leh handicrafts bakah nursing & paramedics te thlurbing bik a ni ang.

G-20 hi ram 19 leh European Union ten khawvel pum economy-a harsatna thlentute sutkian leh hmasawn tlan theihna tura forum an din a ni a. Member-te chu Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, United Kingdom, United States leh European Union an ni a. India in Presidency a chelh chhung hian Prime Minister Narendra Modi chu G20 Chairman a ni.