Aizawl; General Administration department (GAD), Secretariat Administration Wing hnuaia Provisional Employee (PE), IV Grade - post 20 lak turah he hna dil mi 6,000 (admit card pekchhuah tur) chuang an awm a, March 15, 2022 atangin admit card pekchhuah tan a ni.

ZALEN thudawn danin, GAD hnuaia PE lak turah hian thiamna lamah pawl 8 passed chin tih a nih laiin, hna dil zingah BA, B.Com an awm nual bakah, computer lama thiamna sang tak tak nei thahnemtak an awm.

He hna dil zinga mi thenkhat ZALEN in a biakte chuan hnathawh tur a van vangte, sawrkar hnathawh chu innghahna tlak ber a an ngaih vangte in an dil tih an sawi a, diltu an tam avang erawh chuan beisei an neih san hran loh thu an sawi.

Hna dilna lut atanga interview hmachhawn tur a pawm, admit card lam thei tur mi 6,300 bawr vel an tling nia thudawn niin, admit card hi tun March 25 thleng lak chhuah theih a ni. Hna dil an tam avangin GAD chuan interview board an siambelh dawn a, hemi avang hian interview tura koh te chu an hun bawhpelhlo turin an ngen.