Gujarat state khawthlang lama awm, Porbandar-ah October 2, 1869 khan Mohandas Karamchand Gandhi hi a piang a. Nakumah a pianchamphaphak vawi 150-na kan lawm dawn a ni.   Gandhi-a hian 1888-1891 chhung University of London leh Inns of Court-ah lehkha a zir a. India-a a lo kir hnu lawkah South Africa-ah a kal a. South Africa-a a awm lai hian zan khat chu Rel Ticket First Class lain relah a chuang a. Rel police (English mi) chuan a nam chhuak a, bungraw phurhna pindana insawn turin a hrilh a. Gandhi-a chuan first class ticket nei, bungraw zinga han chuan chu a duh bik lo va. Rel Station-a waiting room thim takah chuan zan khawvawt hnuaiah a thu tlaivar ta a. Hemi zana a thil tawn hian Gandhi-a rilru chu a tidanglam vek a. Mingo sorkarin hnam dang, vun rawng hran avanga a hmusit a, ran anga an chhawr thin chu chhan chhuak turin a rilru a siam ta a. Josefa-an Midian sumdawngte hnena amah hralhtu, a unaute hnena, “Mak taka chhan tur cheuin Pathianin min lo tir hmasa a ni; nangni leh in thlahte in mangan lohna turin. Hetia min kaltirtu hi nangni ni lovin Pathian a lo ni,” (Gen 45: 7f) a tihte pawh min hriat chhuahtir awm e. Gandhi nun innghahna chu: Thutak (Truth) Ahimsa (Non- Violence - Tharum thawh lohna) leh Satyagraha (Truth Force or Truth Power - Thutak thiltihtheihna) te a ni. Hengte hi then hran theih loh khawpin a inphiar zawm vek a ni. Bible-in, “Chakna ni lovin, thiltihtheihna ni hek lovin, ka thlarau zawkin le,” (Zak 4:6) a tih angin Gandhi-a chuan thutak hmangin a khingpuite a hmachhawn thin a. Heihi Satyagraha a tih chu a ni.   Satyagraha a hman hmasakna ber chu South Africa-ah a ni. 1906 khan Kumpinu sorkar chuan India mi sing tam tak South Africa-a hnathawk tura an phurh thlakte chu an hming chhinchhiah vek a, an hming ziahna card chu englai pawha awrh turin Registration Ordinance a siam a. Gandhi-a chuan he Dan hi a duh lo va. India mi sing tam takte chu a ko khawm a, he Dan hi pawisalo turin a hrilh a. An zinga thenkhat chuan, “Sorkar thupek kan zawm lohchuan police-in min man ang a, min vua ang a, lung inah min khung dawn asin,” an ti a.Gandhi-a chuan, “Police-in min man ang, min vua ang, lung inah min khung ang. Mahse, tuman kutzungtang hmawr pawhin kut kan thlak let tur a ni lo. Lung ina leng lovin police kut kan tuar hnuah chuan sorkar a mangang ang a, he Dan sakei hi an sut lo thei lo vang,” tiin a chhang a. Gandhi-a sawi ang chuan mipui chuan police leh lung in hlau hauh lovin Registration dan duh lohna chu an entir ta a. Sorkar chuan Dan chu a sut leh ta a ni.   Gandhi-a hi 1914-ah India-ah a lo kir a. 1915-ah Gujarat khawpui pakhat, Ahmedabad bula Sabarmati lui kamah Ashram a siam a. A hnuah Maharashtraa Wardha khaw bula Sevagram-ah a siam bawk a. Sabarmati Ashram atang hian kum 16 chhung India tan zalenna a sual a. India-in zalenna a hmuh hnuah Sevagram atang hian India ram inpumkhatna atan a bei leh ta a.   Gandhi-a hian thutak hi pathian nia a hriat avangin dik lo nia a hriat chu tharum hmang lovin huaisen takin a do thin a. Entirna pakhat han sawi ila: Kumpinu sorkar khan India miten chi (salt) an siam a phal lo va. Chi hi to tak takin a hralh thin a. India miten an rama an siam theih ve reng siam phal lova Sapho siam to tak taka an leitir hi duh lohna entir nan March 12, 1930-ah Sabarmati Ashram chhuahsanin km 240-a hla Dandi thleng kein a kal a. Dandi-ah chuan sorkar dan bawhchhiain chi a zu teng ta a. Sabarmati a chhuahsan dawn hian Gandhi-a chuan, “India-in zalenna a hmuh hma loh chu ka lo kir leh tawh lo vang,” a ti a.   Sabarmati leh Sevagram Ashram tlawh tawhtute tan chuan Gandhi-an, “India-in zalenna a hmuh hma chuan ka lo lir leh tawh lo vang,” a tih hi a mak tih loh theih a ni lo. Sevagram hi BD ka zirna Union Biblical Seminary Yavatmal atanga hla lote a awm a nih avangin ka tlawh fo thin a. Gandhi-a hi saruaka awm, hrenpereng kaih, pheikhawk mumal pawh bun lova awm thin a ni a. Delhi-a a zin chang pawhin mi rethei, in leh lo nei lo, Slum Area an tih, Bangi-a thleng mai mai thin a ni a. Ram dang atanga lokalte pawhin a riahnaah hian an hmu thin a ni. Heti khawpa mawla khawsain ni tla seng lova roreltu hneh theih a inring hian mi a cho lo thei lo.   Gandhi-a nuna ka hmuh chu Sincerity (Tih tak takna), Simplicity (Mawltea khawsakna) , Self-Suffering (Mahni inthununna) leh Soul-Force (Thutak thltihtheihna) te hi a ni. Hei hi Sevagram-ah leh Sabarmati Ashram-ah chiang taka hmuh theih a ni. Sevagram Ashram-ah hian thinga siam vawthlep te, Bible leh Gita te, Roman Catholic hovin tawngtaina atana an hman thin Tulsi thinga siam, Rosary te, laduang te leh Gethsemani huana thingthia Isua tawngtai lai lemte bak engmah hmuh tur a awm lo.   2015 August thla khan Prof. J.V.Hluna nen Sabarmati Ashram hi kan zu tlawh leh a. Gandhi-a la kaihna hmui te, a mutna khum te, a ei-rawngbawlna hmanraw mawl tete te, mau tiang a hawl thinte a ngai ngaiin an lo la vawng tha a. A in pawh chei danglam lohvin Electric Wiring pawh awm lovin, a kawt vela vaivutte pawh a ngai ngaiin an la vawng tha vek a. Gandhi-an khawvela sorkar ropui ber, kumpinu sorkar a dona hmanrua hmuh theihte hi chu a va mawlin, a va tlawm em! Juda tleirawl Davidan virvawm leh lungte hmanga Philistia mi lian, Goliatha a beihte min hriatchhuahtir a ni.   Gandhi-a hian thutak thiltihtheihna a rin em avangin eng harsatna pawh tawk se chaw ngheiin a tawngtai thin a. A chanchin ka han chhiar nawn a; ni 154 zet chaw ngheiin a tawngtai tih ka hmu a. A chang chuan ni 21 te, ni 10 te chaw a nghei thin a. Vawi khat chu thih thlenga chaw nghei a tum a. Sorkarin a thil phut a tihhlawhtlinsak avangin thi em lovin chaw nghei chu a titawp ta a ni.   August 14, 1947-a India-in Independence a hmuh hnuah Hindu maktaduai 400 leh Mosolman maktaduai 40 te inkarah inhriatthiam lohna a lo zual ta a. Calcutta leh Delhi khawpui kawtlaite chu mitthi ruang leh thisenin a khat a. Gandhi-a chuan, “In rinawm lohva in inthendarh chuan ka tan nun a sawt lo,” tiin chaw a nghei leh ta a. Ni 6 a nghei hnu chuan a taksa a lo chau ta hle a. Hindu leh Mosolman hotute chu an inhmukhawm a, Gandhi-a hnenah, “Kan rinawm tawh ang a, inpumkhatin kan awm tawh ang,” tih an hrilh a. Gandhi-a chuan Gita leh Koran atanga thu chhiar turin a ngen a. “Isua Kraws mak tak chungah khan” tih hla an sak hnuah Mosolman Congress hruaitu, Maulana Abdul Kalam Azad-an sertui a intir a, a chawnghei chu a ti tawp ta a ni. Gandhi-a chuan, “India chu Hindu te, Mosolman te leh mi zawng zawng, kan vai atan a ni,” a ti a. Mahse, Rashtriya Swayameva Sang (RSS) hruaitute chuan, “India chu Hindu ram a ni a, hnam dang an awm ve a thiang lo,” an ti a. An tan chuan Gandhi-a chu mi hnawksak, ram leh hnam hmelma a ni. January 30, 1948 zingah Gandhi-a chu a dan pangngaiin tawngtaina hmun panin a kal a, a tu pahnihten an kaikuah a. Tawngtaina hmun a thlen dawn tepah mi pakhat a hmaah a rawn ding a, “Mahatma ji, vawiin chu i va tlai ve,” tih pahin puakrukin hmun leh hmunah vawi thum a kap a. He pa, Nathuram Godse hian Gabdhian Non-Violence leh inpumkhatna thu a zirtir hi silai hmanga tihtawp a tum a ni. A hlawhtling em? Teuh lo mai! “Enteh, Kalvari tlang chungah,   Tlukna puite a kehchhia; Pathian hmangaihin a khuahte, A puakdarh a va tihzia,” tih hla angin Gandhi-a zirtirna chu a lo puak darh ta zawk a ni. Kan ram zimte hi i han thlir teh ang. Congress sorkar chu Congress member-te tan chauh; MNF sorkar chu MNF member-te tan chauh; PC sorkar pawh PC member-te tan chauh a ni thin. MLA thlanna kan nei leh dawn. Eng party hruaitute mah hian inpumkhat a tulzia an sawi lo va, inpumkhat duhna pawh an nei hek lo. India ram state thenkhata district pakhata awm mihring pawh zat lo hian kan vaiin lungrual takin aw chhuah mah ila khawvel chu sawiloh India ngei pawh hian ngaihthlak tlakah a ruat dawn em ni? Tlem naka laia kan inreltawna kan insehtawn thin hi chu mi nuih kan tiza a nih hi. October 2-a Mahatma Gandhi pianchamphaphak kan lawmnaah hian thinlung takin, “Inpumkhat leh zai i rel ang u,” tiin i zai rual teh ang u.