Aizawl; Gauhati High Court (GHC), Aizawl Bench chuan thla 6 chhung (January - June) khan thubuai chi hrang hrang a khawihah thutlukna (judgement) 36 tichhuak tawhin, thupek (order) 165 a chhuah tawh.

GHC, Aizawl Bench tarlan danin kumin chhungin thla tin judgement tihchhuah a awm a, thla 6 liam ta chhunga judgement tihchhuah tam ber thla chu February niin, judgement 13 tihchhuah a nei a, January ah 4, March ah 11, April ah 2, May ah 5 leh June ah judgement tih chhuah 1 a nei.

High Court hian judgement bakah order a tichhuak thin a, kumin kal mek a order a chhuah tam ber thla, March ah 48 a chhuah a, a tlem ber thla May ah 18 a chhuah thung. January ah 20, February ah 25, April ah 28 leh June ah order 26 tih chhuah a nei.

Tun ah hian GHC, Aizawl Bench pisa thar tur sak mek niin, a sakna tur lung chu March 4, 2017 khan phum a lo ni tawh a, cheng nuai 4624.12 senna tur niin, ruahman dan chuan kum 3 chhung a sak zawh tur a ni a, a sakna tur sum za zel a 90 chu DoNER ministry tum a ni.

Gauhati High Court, Aizawl Bench in kumin thla 6 chhung a thubuai a ngaihtuah langsar zingah Lunglei a RT-PCR laboratory bun chungchang a tel a, RT-PCR for Chhimbial te PIL thehluh niin, court thuchhuak hnuhnung ber ah chuan laboratory building sak zawh hma a hman turin building awm sa ah RT-PCR testing laboratory lo siam lailawk tha a ti a, PIL hi ngaihtuah chhunzawm zel tur a la ni.