ZALEN, December 20, 2025: Fahrah leh naupang chanhai tan Mizorama passenger car hralh tam ber, GIG Motors leh electric vehicle hralh hnem ber, MST Motors an luang chhuak.

Maruti Suzuki dealer GIG Motors-in an sumdawnna piah lamah tanpui ngaite tan hma lakna an kalpui tel a, kum tin an sem chhuak thin a. Kuminah naupang pualin Thutak Nunpuitu Team (Muanna Veng), Abundant Life Mission (Durtlang) leh Special Home (Durtlang North)-a awmte tan hun hlimawm an buatsaihsak.

Falkland Park-ah hruaiin fahrah naupangten an la tem ngai loh intihhlim an huaihawt a, chhun chaw an eipui bakah mi mal hnenah Krismas thilpek an hlan theuh a. Naupang hlim hmel an hmuh rualin zawngchhangthlak an ti hle.

GIG Motors hian kum tina an tih thin danin fahran enkawlna hmunpui, TNT tan Krismas ruai an thehna tur bawng an pe bawk a ni.

Mizorama Ather electric vehicle dealer MST Motors, Bawngkawn chuan Inrinniah charity ride an buatsaih a, thawktute bakah an hnen atanga electric scooter leitu eng emaw zat an feh chhuak.

Gan Sabra (Luangmual) tlawhin Motherless Baby Home (Temple Square, Tuikual South)-ah hun an hmang bawk a. Naupang chanhaite hnenah ei tur chi hrang hrang bakah thawmhnaw an pe a, home pahnihah hian Rs 35,000 ve ve an hlan nghal bawk.

An sumdawnnaah hma lam an pan zel avangin lawmthu sawina peng khat a nih thu MST Motors chuan an sawi a; India rama electric scooter chak ber, Ather zuartute hian December 20 thlengin Vahan-ah kumina lirthei an hralh 585 an ziak lut tawh a, kum a tawp rualin 600 tlin theih an inbeisei.