-Mazema Kawlni

British-in Min awp hma leh min awp hnu-ah pawh, hun rei tak chhung, 'Lal ban' hun hma zawng kha chuan Mizoram chhunga khua zawng zawng kha chu Lal rorelna hnuaiah kan awm a. British-in min awp hma phei kha chuan khaw tin kha Independent Country vek kan ni mai awm e. Mahni chenna khua theuh venhim leh enkawlna kawngah Lal leh a khawnbawlte'n mawh an phur thui hle a, Lal rorel thiam deuh leh taima deuh khua chu an intodelh hle thin a ni. Mipui thinlungah pawh mahni chenna khua hma-ngaihna a in tuh lian hle.

British-in min han awp a, Mizo chenna khua chu Ram bungkhat angin min han siam a (Zohnahthlak chenna zawng zawng erawh a huam vek lo). Rorelna pakhat hnuaiah khaw hrang hrang chu kan kun za ta a. Khawvel a lo in her danglam zel a, India independent hnuah Mizoram pawh chu India ram chhungah rinluh a lo ni ta. India atanga tal chhuah leh a, mahni a ro inrelna ram nih leh tumin theih tawp kan chhuah a. Kum 20 zet rambuai kan nih phah a. Amaherawhchu, vawiin ni thleng hian lungsi zan lo chungin India ram awp chhungah chuan kan la awm ta tho a ni.

Khawvela Democracy ram lian berah kan cheng a, Mizoram pawh Lal chhungkaw rorelna kalsanin, kan chunga roreltu tur chu kan thlan a lo ngai ve ta a.Chhungkaw hawp khawp thar dan tur bak ngaihtuah ngai lo khan state pumpui hmasawnna leh Ram pumpui hmasawnna ngaihtuah a lo tul ta a, Kan khawchhung bika roreltu tur te, State pumpuia roreltu tur te leh Ram pumpui a roreltu tur te kan thlang ta thin a ni.

Tualchhung leh Ram pumpui a roreltu thlan chungchang bik hi chu lo dah tha ta ila, kan hma lawkah State General Election kan hmachhawn leh dawn a. Inthlan pawimawh tak a ni a, kan State hmasawnna tura kawngro su tu ber kan ti thei awm e. Kan vawikhat inthlanna tur a ni lova, Mizoram pawh State kan nih atangin kum 37na kan hmang ve der tawh. State hmasawn chak tak kan nih leh nih loh kha chu mimal ngaihdan ni se.

MLA (Member of Legislative Assembly) inthlan hi a pawimawh khawp mai a, vote nei thei chin chuan rilru fim taka kan thlan pawh a ngai a ni. State hmasawnna tura a ki pawimawh ber an ni a, mipui lam hian kan state pumpui ngaihtuah chunga vote kan thlak hi a tul takzet. Heng State pumpui mamawh leh hmasawnna tur: Kawlphetha, Zirna, Hriselna, Ei leh bar, inkalpawhna tha leh adang te ti hmasawn zawngin hna an thawk em tih te hi kan ngaihtuah thleng tur a ni. Hetiang a hmasawnna hna thawk tur an nih lai hian, kan MLA te laka kan beisei leh kan phut hi a eng nge tih in zawt ila. Thenkhat te thil beisei hi chu a ho deuh em aw ka ti thin. Kan khua leh veng hmasawnna ringawt tuipui hi kan ang deuh thin hian ka hria. Hmasawnna kan beisei dan hian kan khua hi a pel hleithei meuh lo thin chu a ni.

State pumpui tana hmasawnna hnathawh hmuh tur a awm lem loh lai pawh hian, kan khua a Kawtthler pakhat min tih that sak vang te, Hall thar min sak sak vang mai mai te, Khawi maw lai link road min laih sak vang te hian MLA tha ber chhuah hian kan chhuah deuh tlat zel nia. Mizoram chak lakna kawngpui ber a chhiat em em lai te, Power Supply hman khawp kan siam chhuak theih miah loh te, Ei leh bar thar chhuah kawnga hmasawnna hmuh tur a awm lo te, Health Care chhe lutuk reng mai te hi kan MLA te mawh a ni tih lam hi kan ngaihtuah vak lo thin a ang. Kan khua leh venga thil thar pahnih khat lek min tih sak hi MLA tha teh nan i hmang lo hram ang u. State pumpuiin kan chhawr tlan theih hmasawnna hna hi kan MLA te hian an thawk em tih te hi i ngaihtuah thin ang u.

Kan MLA te lah hian min tih lungawi dan tawk lah hi an thiam nasa mai si a. State tana ro tling leh chhenfakawm tak tur hna thawk lo mahse, an bial chhung khaw hrang hrangah hmasawnna beitham te te hi an thawk a. Kan khaw hmasawnna ringawt mai tuipui ta chu, mipui lah kan lo lawm tawk viau thin mai bawk nen. State hmasawn nih hi a har teh zawng a ni e.

Kan khaw bil hmasawnna ringawt kan tuipui hian a tha lo zawnga nghawng a neih langsar tak chu- State kan nihna pawh kum 40 dawn anih thleng hian State intodelh lo ber kan nih phah a, Kan chak lakna kawngpui pawimawh ber pawh vawiin ni thlengin ala chhe em em reng a, Power supply kan la intodelh thei chuang lova. GSDP atanga tehin State leiba ngah ber kan ni mek a ni.

Kan ngaihtuahna hi kan khua atang hian kal chhuah tir ila, kan State pumpui hmasawnna tur ngaihtuahin, kan chenna state chhunga roreltu tur i thlang teh ang u.