Aizawl September 25, 2023:  Vawiin khan Durbar Hall, Raj Bhavan, Aizawl-ah khawvel puma bengngawng te puala ni bik "World Day of the Deaf" chu hman a ni a. He hunah hian Governor Dr. Hari Babu Kambhampati chu khuallian niin Dr. R. Lalthangliana Health Minister chu Kualzahawm a ni.

Governor chuan Bengdar mamawhtu zirlai thlanchhuah 320 hman turin Bengdar tha chi, pakhat Rs 20,000/- chuang man, a vaia belhkhawm a Vaibelchhia 6.4 man, COAL India Limited hnuaia Corporate Social Responsibility (CSR) atanga Deen Dayal Sravana Foundation (DDSF), Andhra Pradesh-in a lakchhuah chu a sem chhuak nghal a ni.

Governor Dr. Hari Babu Kambhampati chuan Program a tel tura sawm, Redeem Garden & Ephatha Special School atanga school naupang thlan chhuah mi sawmhnih pakhat (21) bakah Ephatha Special School naupang pali (4) an vaiin naupang sawmhnih panga (25) te hnenah bengdar hi a sem a  ni. 

NPPCD kaltlanga beng dar sem chhuahte hi Call India Limited ten an CSR hmanga an sponsor a ni a. Call India Limited te hian NGO Partner atan Deen Dayal Sravana Foundation (DDSF) an hmang a. Anni nena thawk hovin National Programme for Prevention and Control of Deafness (NPPCD) thawktu te chuan Mizoram chhunga Bengngawng, bengdar vuah ngai zawnchhuah hna hi an kalpui a. Kumin 'Bengngawngte Ni' pual bengdar sem chhuah thawh khatna hi Governor ho hian neih a ni.

Governor hova hun hman a nih rual hian DHME Conference Hall, MINECO-ah Bengdar vuah ngai mi 177 dang koh khawm an ni a, Measurement (Ear Mould Inpression) lak sak an ni. Aizawl district leh district dang atanga bengdar vuahsak turte measurement lak sak zat chu: Aizawl East-103, Aizawl West-8; Kolasib Dist-32, Mamit Dist-11, Saitual Dist-1 leh Serchhip Dist-22, an vaiin mi 177 an ni. 

September ni 27, 2023 hian Lunglei Civil Hospital-ah Lunglei Dist-36, Hnahthial Dist-4, Lawngtlai Dist-24, Siaha Dist-1 an vaiin mi 65 te ear mould impression hi tihsak an ni ve leh ang a, Champhai district-a mi 67 te tan pawh hetiang hun hi remchang hmasa bera neih ve leh nghal tur a ni a. Heng hi zawh fel a nih chuan Call India Limited ten, Deen Dayal Sravana Foundation kaltlanga bengdar an pek turte hi mi 334 an tling thei dawn niin Dr Lalthanmawii Khalthang, Consultant NPPCD chuan a sawi a. Beng dar hi kumin October thla chhunga sem chhuah hman vek an inbeisei thu a sawi bawk.