DOWNLOAD OUR APP

Read latest news on your phone
app-store

Grand Slam ngaihhlut hlawh Wimbledon khel tan dawn

Jun 27, 2021

Tournament hian thla thar July ni 11 thleng a awh ang

Grand Slam zinga phul chung a khelh awmchhun Grand Slam tennis tournament ngaihhlut hlawh, 2021 Wimbledon Championship chu naktuk zan atanga khelh tan a ni dawn ta, tournament hian thla thar July ni 11 thleng a awh ang. He inkhelh hi All England Lawn Tennis Club leh International Tennis Federation te buatsaih niin The All England Lawn Tennis and Croquet Club, London, United Kingdom-ah khelh a ni ang. 

Coronavirus hri leng vangin nikum lam khan he inelna hi buatsaih a ni lova, khelh hnuhnun ber kum 2019 khan mipa single-ah Novak Djokovic a champion a, hmeichhe lamah Simona Halep-i'n nomawi a chawi thung. Mahse, tun competition-ah hian chawn bawr hliam vangin Halep hi inhnuk dawkin a tel thei dawn lo. 2021 Championship hi a vawi 134-na tur niin hmeichhia bik hian vawi 127 an khelhna tur a ni thung. 

2021 Wimbledon Championship-ah hian prize money £35,016,000 sem ral a ni ang. Mipa leh hmeichhe final khelhna tur Centre Court-ah entu mipui 15000 chu a hmuna en phal sak an nih tur thu British sorkar chuan an puang tawh a ni.

Novak Djokovic hi champion zawn mek a nih bakah Frence champion hlim a ni bawk a, Grand Slam title tum 20 champion tawh pahnih Roger Federer leh Rafael Nadal te record ropui tlukna hun tha a nei thei dawn a, tin Federer pawhin Grand Slam title chawi tam ber ni turin nomawi 21-na a beisei thei dawn bawk. Djokovic hi a chak a nih chuan mipa player zinga kum khat chhunga Australian Open, French Open leh Wimbledon title la thei awmchhun Rod Laver (1969) a tluk chiah ang a, 2010 khan Nadal-a'n major tournament-ah nomawi pathum a chawi tawh bawk. 

Djokovic leh Daniil Medvedev te hian number 1 ranking nih an inchuh dawn a, Medvedev hi a champion emawh Djokovic-a'n final a thlen zawh lova, a nin final a thlen phak bawk chuan number 1 a ni thei ang. 

Vawi hnih champion tawh Nadal hi kum 2016 hnuah a vawi khat nan a inlan thei dawn lova. Tum hnih champion tawh tho Andy Murray chu 2017 hnua a vawi khat nan wild card hmangin a inlan thung ang.

Hmeichhe lamah Simona Halep chu champion leh thei tura rinkai a ni chungin a chawn bawr na vangin a inhnukdawk a, Serena Williams pawhin Margaret Court record neih mek Grand Slam title 24 nihrual pui a tum dawn a ni. 

Ashleigh Barty leh Aryna Sabalenka te pahnih chuan WTA No. 1 single ranking nih an inchung thung ang. Barty hian semifinal a thleng phak a nih chuan number 1 nih zui theihna hun tha a nei ang a, Sabalenka thung hian ranking pakhatna ni tur chuan champion a nih ngei ngei a ngai thung.

The All England Lawn Tennis and Croquet Club hi private club niin kum 1868, ni 23 July daih tawha din a ni. 

Tennis tournament zingah chuan ngaih hlut ber pakhat a nih vangin kei ka ni intichin tennis khel thiam chuan tel an tum vek a, telh leh khelh phak lo lo deuh te pawhin wild card hmangin khelh ve ngei an tumnaah hian ram hrang hrang atangin champion tum player thahnem tak an fuan khawm leh dawn a. 

Heng player tha fuan khawm tennis thiam tak tak te hian an mahni category theuh men's (singles leh doubles), women's (singles leh doubles), mixed doubles, boys (under 18 – singles leh doubles) bakah girls (under 18 – singles leh doubles) ah te champion tumin theih tawp an chhuah dawn a ni. 

Winbledon tournament hi Grand Slam dangte anglo takin danglamna thenkhat a nei a. Tournament hi Grass court-ah chauh khelh a ni thin a, bakah phulah hian ball a kal chak thin bik vangin player tam takin inkhelh harsa an ti thin hle. Tin, thawmhnawm hi a uluk hle a, a bika inbel tur ruahmanin player te thawmhnaw var chauh inbel phal a ni a, entu mipui lam pawh an smart thei hle thin. 

Share now