Aizawl: Mizoram sawrkar chuan kuthnathawktute grape tharchhuah wine zawrh phalna ‘gazette’ a tichhuak tawh a, hetih lai hian zawrh phalna dil erawh an la awm lo.

ZALEN thudawn danin Printing & Stationery department chuan kar kalta khan wine zawrh phalna gazette hi an chhuah a. Ruahman dan chuan grape wine zuar duhte chuan Excise & Narcotics department-ah permit an dil a ngai dawn a. Zirtawpni kalta thleng khan permit dil hi an la awm lo nia thudawn a ni.

ZALEN-in Hnahlan Grape Growers & Processing Cooperative Society hruaitute a biaknaah winery atanga Isabella an siam chu an la hralh chhuak hrih lo niin an sawi a. “A tam tham ang chuan kan la hralh chhuak lo a; mahse, sawrkar department leh tute hnenah emaw chuan tlem tete chu kan hralh tawh a ni,” an ti.

Champhai Grape Growers Society hruaitute chuan Champwine chu an hralh deuh reng niin ZALEN an hrilh a. “Aizawl, Serchhip leh Lungleiah te zawrh turin kan pe chhuak a, a zuartute atangin harsatna an tawh awm kan hre lem lo,” an ti.

Champhai Grape Growers Society hian October 12, 2022 hian wine rules sawrkarin a siam lawm an tum tih Zalen hrilhin he hunah hian minister leh sawrkar mi pawi-mawhte sawm an tum tih an sawi bawk.
    Champhai Grape Growers Society hian kumin chhunga grape an lak zawng zawng hi 1,12,781.3 kg a ni a, grape petu zat hi mi 79 an ni.