France : France national team hi an player thlir chuan tun Euro-a team tha ber pawla ngaih an ni a, an chakna leh theihna hian hmun sang a hruai thleng ngeiin a rinawm. 

Tlar hma lamah Karim Benzema, player of the tournament beisei phak Kylian Mbappe te, midfield lamah N'Golo Kante leh Paul Pogba te an awm bawk. 

An chesual fe a nih loh chuan France hi group winner tura ngaih an ni a, round sang zawkah pawh che tha chho zel tura ngaih niin champion hial pawh beisei phak an ni. 

Germany: Mimal anga player langsar vut awm lo mahse, Germany hi an team thawhhona that vang leh an rilru huaisenna vang hian tournamentah hian an hniam ngai lo. An group awmna a fuh viau lo chung hian  Euro 2020 group round chu an paltlang ngeiin a rinawm. Coach Jochim Low-a chher hriam hi Hansi Flick hian chhawr thiam tak maw. 

Group khata an awmpui Portugal leh France te hnuaiah awmin pathumnaah awm mahse round of 16 ah chuan an lut tho turah chuan a dah ngam awm e. Knockout round-ah Netherlands, Turkey emaw England tum thei an ni. Football ram ropui an nih angin an tichho nek nek anga, semi-final chu an thleng maiin a rinawm.

Portugal: Euro 2020 qualifyingah an chetthat tawk loh vangin plot 3-ah an awm phak hram a, anni aia chetha ram pahnih Frence leh Germany te nen an awm ho a ngaih phah ta a ni. An vanduai belhchhah turin group stage hi paltlang pawh nise round of 16-ah Group D lam atang team tha bera ngaih England an tum hlauh thei. 

Cristiano Ronaldo a hming a langsar viau a, chutih rualin a thachhang dawltu Euro 2016 an champion tuma squad zing ami Bruno Fernandes, Bernardo Silva, Joao Cancelo, Ruben Dias leh Ruben Neves an la awm cheu. 

Portugal leh England hi an an intum hlauh a nih chuan a chak zawk chuan final an thleng ngein a rinawm.

Hungary: Hungary hi Euro dawngtu ram zingah tel mahse an group awmna hi an duh thlan tur ni ngat se an thlang bikin a rinawm loh. Round of 16 thleng tura beisei neilo tawp chu an nilo naa, Euro 2020 champion rin kai phak thiau France, Portugal leh Germany te nena awm ho an nih vang hian an group zingah chuan beisei nei chau ber a ngaih theih an ni.

Group F atanga Hungary tena beiseina an neih theih dan awmchhun chu 'rock, paper, scissors' tia vannei tur thlan nise emaw an group-a team dang te inhneh kual dan a zirin an tlang ve nawlh thei bawk. Group Stage bak an in pet thlen a beiseiawm chiah lo.