ZALEN, September 10, 2025: Sports Utility Vehicle (SUV) siam kawnga India rama hmahruaitu Mahindra & Mahindra Ltd. chuan GST tihdanglam avanga an lirthei man tlawm dan tur tifelin, September 6, 2025 atang khan internal combustion engine hmang passenger car an siam chhuahte man tlawm zawkin an hralh chhuak.

September 3 khan GST Council meeting vawi 56-na chuan September 22 atangin India ramah GST 2.0 hmang tan turin thutlukna a siam a. Mahindra chuan sorkar laipui hun bituk nghak kher lovin anmahni dawrtute tan a rang thei angin ham thatna an siamsak zui ve nghal.

GST tharah hian lirthei man a tlawm phah dawn a, mi mal car hman chi petrol engine 1200cc chin hnuai lam leh diesel engine 1500cc chin hnuai lam metre 4 aia sei lote chu GST 28% ni thin kha 18% a ni tawh dawn.

Hemi chung lam car liante erawh GST 40% a ni dawn a, a hmain GST 28% ni mah se cess leh compensation atangin sorkarin 20% a lak belh avangin a vaiin chhiah atan 48% an pe a. GST tharah cess leh compensation awm tawh lovin 40% lak tawp a ni dawn a, a hma aiin 8%-in a hniam phah ang.

Mahindra chuan GST thar mil tur hian September 6 atangin mi mal hman chi car an siam chhuahte an titlawm lawk vek tawh a; an car-te hi SUV vek niin Bolero/Neo man cheng nuai 1.27 thlengin an titlawm a, XUV3XO (petrol)-ah nuai 1.40 leh XUV3XO (diesel)-ah nuai 1.56, Thar (two wheel drive)-ah nuai 1.35 leh Thar (four wheel drive)-ah nuai 1.01, Thar Roxx-ah nuai 1.33, Scorpio Classic-ah nuai 1.45 leh Scorpio-N-ah nuai 1.45, XUV7OO-ah nuai 1.43-in a man an tihniam.

Mizorama Mahindra full range dealer Mana Motors pawhin company thu chhuak angin September 6 atangin SUV hrang hrangte hi man tlawm zawkin an hralh a. September 22 atanga hman tur GST 2.0 ai mahin tunah hian a tlawm zawk a, a man a tlawm tak avang hian dawrtu pawh an tam phah niin an sawi.

Mana Motors General Manager Ramnghahmawia Ralte chuan, “September 6 atang khan company-in mi mal hman chi car kan zawrh chhuah ho man a rawn titlawm tawh a, GST thar hman hun tur aiin a tlawm zawk leh nghal. Cheng nuai chuanga a man a tlawm tak vek avangin ngaihventu pawh kan ngah phah a, Bolero phei chu kan hralh thei viau a, Bolero Neo phei chu kan stock a zo tawh,” a ti.

Car hrang hrangah a man tlawm dan a inan loh bakah model hrang hrang man a inan loh avangin a danglam ve zel bawk a; chutih rualin tunah hian Mana Motors hian Bolero-ah nuai 1.23 leh Bolero Neo-ah nuai 1.30 thlengin a hma aiin an hralh tlawm a, XUV3XO-ah nuai 1.57, XUV7OO-ah nuai 1.50, Scorpio Classic-ah nuai 1.30 leh Scorpio-N-ah nuai 1.71 thlengin an tihniam a ni.