Congress party chuan Gujarat assembly inthlan turah hnehna an chang a nih chuan Ahmedabad-a Narendra Modi Stadium chu Sardar Patel Stadium tia thlak an tum tih an puang.

Inrinnia an party manifesto an tihchhuahah an hruaitu hlun, Rajasthan Chief Minister Ashok Gehlot chuan  sorkar an siam a nih phawt chuan an cabinet meeting hmasak berah an manifesto chu an ngaihtuah nghal tur thu a sawi.

Gujarat-ah hian assembly inthlan hi thawh hnihin, December 1 leh 5 hian neih a ni dawn a; December 8-ah vote thlak a ni ang.

Gujarati tan hna nuai 10 siam an tum thu manifesto-ah hian an tar lan bakah sorkar hnaah hmeichhiate tan a zahve (50%) hauhsak leh hmeichhia, hmeithai leh pitar tan thla tin Rs. 2,000 pek an tiam bawk.

Congress hian saptawng hmanna sikul 3,000 hawn a nih tur thu leh hmeichhiate zirna chu post-graduate thlenga a thlawna an kalpui an tum bawk.

Heng bakah hian lo neitute pawisa puk Rs. Nuai 3 thleng ngaihhnathiam te, thla khatah electric unit 300 zel a thlawna pek te, thalai hna nei lo hnenah thla tin Rs. 3,000 pek te, ei rawngbawlna gas bur khat Rs. 500-a hralhte an tiam bawk.

BJP kaihhruai sorkar an hrawn mek chu Gujarat-a ei rukna  titamtu a nih thu Gehlot chuan a sawi a, “Congress-in thuneihna a chang a nih chuan kum 27 liam ta chhunga ei rukna thil complaint chu chhui vek a ni ang a, tisualtu chu hrem a ni ang,” a ti.

Gujarati-te chu Rs. Nuai 10 thleng a thlawna damdawia inenkawlna pek te, a thlawna health checkup leh damdawi Rs. Nuai 5 thleng pek tel te pawh Congress hian an manifesto-ah hian an tiam a; Covid-19 avanga thi chhungte hnenah zangnadawmna Rs. nuai 4 pek an tiam bawk.

Candidate Puan Belh

Gujarat assembly inthlan tur atan hian rorel lai, BJP chuan Inrinni khan an candidate tur puan thawh hnihnaah hming paruk an puang leh.

Candidate puan thawh hnihnaah hian saffron party hian hmeichhe pahnih an telh.

Mahendrabhai Padaliya chu Dhoraji bialah, Mulubhai Bera chu Khambhalia-ah, Dheliben Maldebhai Odedara chu Kutiyana-ah, Sejal Rajiv Kumar Pandya chu Bhavnagar East-ah, Hitesh Devji Vasava chu Dediapada (ST)-ah leh Sandeep Desai chu Choryasi-ah an ding ang.

Ningani khan BJP hian candidate puan thawh khatnaah bial 182 inthlan turah mi 160 hming an lo puang tawh.

Puan hmasak zingah hian mi 14 chu hmeichhia an ni a, 13 chu scheduled caste leh scheduled tribe 24 an ni a. Candidate 69 chu MLA tang lai an ni.

Inthlan thawh khatnaa bial 89 inthlan turah political party langsarte chuan an  candidate tur an puang deuh vek tawh hlawm.

Rorel lai party hian star campaigner tur pawh puangin an zingah hian Prime Minister Narendra Modi pawh a tel.

BJP hian a zawna a vawi sarih nan sorkar siam an tum leh hle a. Kum 27 zet ro an lo rel tawhna a nih avangin an party lenna ber hmun nia ngaih a ni.

Tun tum inthlanah hian Arvind Kejriwal-a kaihhruai, Aam Aadmi Party (AAP) an lang thar a, Isudan Gadhvi chu chief minister atan an vawrh chhuak.

Congress pawhin an chet that ngai lohna state-ah hian chet that tumin an bei nasa bawk.