Joseph L. Ralte

Mob:9862566772

Entrepreneurship kan tih MSME development lamah hian ruahmanna mumal tak, roadmap felfai tak neiin state dang­te hi um ngar ngar ila, kan la umpha thei ang em le? A harsa tawh hle ang. Mahse, theih loh chu a ni lo. Sorkar thar hian hma rawn la ta pawp pawp se. Kum nga chhungin private sector te tan poli­cy, regulations leh operational guidelines an siam fel hman tawk thei chauh ang. He kum 5 chhung hian private sector-te mumal zawka an kal theih dan tur (formalization of private sector) hi kan thupui hmasa ber a nih a ngai.

Vawi tam kan ziak ta. Lehkhabu te hial kan chhuah tawh a. Sorkar inthlakthleng ang zelin ziah thar a ngai zel thin. Kan thinlung rumri, kan vei, kan atchilh, kan tuichilh, kan vahvaihpui a ni a. Kan ziak lo theilo zel chu a ni. He thu hi hmanhmawh thlak si, hmanhmawha nawr vut vut thei si loh a ni a. Chuvang chuan a hmanhmawh thlak em em si a ni.

Sorkar thar alo piang leh ta. Sorkar hmasa zawng zawng aiin mipui an pangchang ta. Beisei a sang em em bawk. He sorkar thar policy lar ber pakhat, thal­ai­te’n an bawh hukna chhan bulpui ber pakhat chu Bana kaih (Handholding support policy), mahni kutkawih eizawnna (entrepreneurship) leh eizawnna tlaka thiamthil zirtir (skill development) lam hma nasa taka lak tur a nih thu hi a ni a. Tun dinhmuna kan ram mamawh (need of the hour) a nih rualin thil buaithlak (complicate) em em a ni. Chutih rual chuan he sorkar thar hian a ti thei ang tih ka ring tlat thung.

Thil pathum - Bana kaih policy te, mahni kutkawih eizawnna leh eizawnna tlaka thiam­thil zirtirna te hi lungthu pathum ang an ni a. Kalkawp rial rial tur, lungthu pakhat thlauh thlaka bel chhuan theih loh, lungthu pahnih paih thlak phei chuan tihngaihna awm hauhlo ang a ni. Heti hian I han sawifiah dawn teh ang.

Bana kaih (handholding support assistance): Bana kaih (handholding support assistance) an tih hi far east countries an tihho – Japan, Korea leh Taiwan lamho bakah Europe ram thenkhat te’n hlawhtling taka an lo enchhin tawh a ni a. Heng rama a hlawhtlin em avang hian India sorkar-in a entawn a, kum 2008 kuma MSME policy hiala alo puan tawh a ni. A tum ber chu thalai, entre­preneurship lama tuimite zawn­chhuah leh thurchhuah (identified) an ni ang. Chungho mahnia kal ngaihna hrelo, an tihtur leh tihloh tur pawh hrelo te chu an bana kaiin an kalna tur kawng hrilhin, a tahtawl te te-in mahni kea an din theih hun thlenga ngaihsak tur an ni. Chu bana kaihna huangchhungah chuan mellung (milestone) tihhlawhtlin ngei ngai a awm ta a.

Mellung 1-naah chuan bana kaih tur thlan chhuah, sorkar hna zawng lova mahni kuta din tum ngei, entrepreneur ni tura tuihal, tumruh leh taima te thlan chhuah tur a ni. A then chuan ran vulh emaw farm siam emaw industry tenau engemaw din an duh ang. Thenkhat chuan restaurant siam emaw insurance lam khawih emaw construction firm tenau emaw siam an duh ang. An tui zawng leh duh zawng a in-ang lo nuaih dawn a ni. Chunghote chu anmahni dinhmun thlirpuiin eng skills nge an mamawh, kan ram tan a tihchi em tih leh market survey a neih dan thlengin, sumlu (capital) engzatnge a mamawha, hna thawhna tur (working capital) engzatnge ngai? Chu sumpai chu khawi atanga hmuh tur nge tihte eng ang firm/farm nge a din theih tihte counseling pe chunga kaihhruai an ngai.

Mellung 2-naah thung chuan chu’ng kan thlanchhuahte chuan Detail Project Report mumal an neih a ngai a, an siam thiam si lova, siampui an ngai. Loan emaw sorkar scheme engemaw an hmuh theihna tura ruahmanna siampui an ngai. Chumai ala ni lova, khawi hmun-ah nge a in set-up anga, tui leh electric a awm tha em tih te, awm lo se engtia tihtur nge tih te, dan leh hrai hnuaia registration leh incorporation tih ngai thil tam tak a awm thei bawk. Pollution Control Board atanga NOC lak ngai chi a ni em tih te MSME registration tih te, an hmanrua leh khawl mamawhte chu khawi atangin nge a lei anga, a khawl thil chu installation leh after sales service ti thei zawnpui thlengin. Chu’ng zawng zawng tihfel a nih hnu-ah chuan sum la lut tura han enzui pui thleng khan he Mellung 2-na hian a huap a ngai.

Mellung 3-naah thung chuan a hmawrbawkna a nih rual­in hna a intan ta chauh thung a. A bungrua emaw service a siam chhuahte chu market linkage a tifuh em tih te, a packaging leh branding en pui te, product develop­ment enpui te a tel vek a. State level, national level leh global level-ah a inphochhuahna tur ruahmanna te enpui an ngai a. Anmahni’n bul an han tan chiah kha harsatna chi hrang hrangin a rawn umzui nghal dawn a, chu’ng harsatna chu technology thil nge financial management nge, man power management nge tihte enzui an ngai ta thin a ni. Hemi an tih chhan ber chu khawvel pum huapa start-up te hi an hlawh­chham nasa em em a, hlawh­chhamna tam tak hi ruahmanna siampui, sualpui an ngai a. Chutiang hlawhchhamna venpui tur chuan data bank an siam a, follow­-up monitoring an ti ta thin a ni.

Hetiang kalphung hi hetia ngaih mai chuan thil khirhkhan leh harsa viauah kan ngai mai thei. Mahse, a harsa lo. Mellung 1-na atanga 3-na thleng hian awmze nei taka kal dan tur ruahmanna fel a awm sa vek a. Khawvel zauzawk­ah mumal taka kalpui dan hi mi fate’n ziakin an lo dah dim diam tawh zawk a ni. Tihhlawhtlin kan duh leh duhloh a thu a ni mai.

Mahni kutkawih eizawnna tihhmasawn (Entrepreneurship development):

Entrepreneurship develop­ment kan sawi tak tak dawn chuan policy thil a ni a. Policy tha deuh chu neih a harsa lo hle ang. Mahse, sorkar policy reng reng reng hi budget-ah sumpai dah tel a nih si loh chuan policy tha thlawn mai a ni thin. Policy kan tih chuan sumpai chauh ala ni lo fo a, entrepreneur-te duh tawka field chhunga an chet velna tur dan leh hrai siamsak an ngai. Chu tak chu “Formalisation of private sector” kan tih thin chu a ni. Football player te’n referee venna hnuaiah, dan phal chhungah pet goal an tum thin ang hian mahni kea an din chhuah theih nan an chetna tur chin te, sorkar chetna tur chin te, financial institution leh bank te chetna tur chin ramri kham a ngai ta a ni.

Kan ram ang state hnufual­ah hi chuan engkim mai hi la mumal lo, dan leh hrai la nei lo, mahni duh hun huna Bawngsa rate tisang mai, arsa rate tisang mai thin kan ni. Duh hun huna mistiri rate tisang mai thin kan ni. Buhfai leh chawhmeh man pawh kan thunun thei lo. Mahni duhna hmun hmuna thil zuar mai thin kan ni. PVC tuizem siam hlawk nia kan hriat chuan kan khawl din sup sup a, market a insubuai leh lawi si thin. Chutiang chu “Unorganised Sector” an ti. Chu chu kan dinhmun a ni a. Chu dinhmun chu tih mumal “Organise” a ngai ta a ni. Chumi atan chuan private sector hi kan tih-mumal (formalize) a ngai a. Entrepreneurship tihhmasawn kan duh chuan “Formalization of Private Sector” hi hna hmasa a nih a ngai.

India sorkar-ah hi chuan ministry ho hi kawng buatsaihtu “facilitator” an nih zia an inhre tawh a. Private sector te luhna tlak tur leh luh itawm turin policy leh pawisa an tawktarh tawh mai a nih hi. Kan ramah chuan kan department te hian private sector te tih tur min tihkhalh a. Facilitator an nihna an hre lo a, entrepreneur te min nekchep zawk mai emaw ni tih tur a ni. He kalphung hi private sector kan tih-mumal hun hunah a rei thei chauh ang. Chuvangin, tum tak tak-na nena thapui thawha beih a ngai a. Data mumal kan neih a ngai a. Sorkar leh private sector te dawhkan khata luanza kan mamawh a ni.

Eizawnna tlaka thiamthil zirtir (skill development): MZU atang ringawtin kumtin mi 1500-1800 vel an rawn graduate a, mi 500-800 vel an rawn post-graduate zo ziah bawk a. India ram khawpui tinah zirlai sang tel kan nei bawk. Kan graduate leh post-graduate tam tak hian certificate an rawn nei a, mahse, eizawnna tlak thiamna an nei tlem sawt hle. He tihdan phung pangngai (conventional learning) hian kan harsatna hi a sukiang zo tawh lo tih hi thudik a ni. New Education Policy (NEP) phei hi chuan zirna pangngai leh engemaw thiamna bik zirchhuahtir (horizontal and vertical mobility) hi an rawn ngai pawimawh ta hle mai. A pawimawh reng bawk a ni.

Kan ramah hian thiam-thil nei tha (skilled-person) mamawh kan ngah hle a. Ram pawna hlawh hniam te tea kan thalaite 3rd class citizen ni tura thawn chhuah tam lam aiin kan ram mamawh thiam­thil kan indaihlohna (skill gap analysis) tih hmasak ber kan mamawh. Chu skill gap data kan neih mil chuan kan ramah skill development kan kalpui hmasak a ngai hle mai. Vanneihthlak takin Labour Employment Skill Development and Entrepreneurship Department te kan nei tawh a. Chak taka thuam an ngai hle a ni.

Kan Industrial Training Institute te khu a hmunah zuk kal ve teh u. Kum engtik atang khan nge up-scale a nih tawh loh hriat a chakawm hle. Kan ITI leh Polytechnic te hi an tangkaiin thalaite tan skills siamtu pawimawh an ni a, ngaihpawimawh an ngai ngawih ngawih a ni. Private Training Provider kan neihte pawh fuihphur an ngai a. Sap ram leh India ram state dangte anga “Community College” an tih ang chi “Vocational Training Institute” te pawh a rang thei anga kan din theih chuan Mizorama kan college ho zawng zawng hian an hmang tangkai nghal bawk ang.

A va thui duh ve. Duhtawk phawt teh ang.