Aizawl; Covid 19 thawh hnihna vanga lockdown hman mek chuan hapta 10-na a hmang tawh a, ni 68 chhung hian mi 14,187 in hripui an kai hman a, he thu ziah thleng hian thi 79 an awm tawh bawk a. Medical operation team leh state contact tracing team te chuan hripui kai zingah dan pumpelh tum leh thudiklo sawi leh an awm thin avangin an hna thui takin a tih khaihlak thin thu ZALEN an hrilh bawk.   

Hapta 10 chhunga hrikai 14,187 zingah tualchhunga inkaidarh tam berin 12,926 (91.11%) niin ram pawn atanga pu lut mi 1,261 (8.88%) an awm bawk a.

Tualchhunga inkai mi 12,926 zingah 4352 (33.66%) chu kaina hriat loh an ni bawk a ni. Inkhuahkhirh puan April ni 20 atanga nimin Inrinni result thlenga belhkhawmin RTPCR, Truenat leh Ragt test sample 196,889 lak hman niin positivity rate chu 7.20% a ni bawk a ni. Mi 9,795 (69.04%) discharge hman an ni bawk a ni.

MoT leh State Contact tracing team lam chuan contact tracing leh kaina hriat loh zingah buaina an tawh thin thu ZALEN an hrilh a. 

"Contact tracing kan han ti a, inlen pawh avanga kai tih kan hriat chian te pawhin midang an pawh lo niin an in sawi fo mai a, quarantine peih loh vanga sawi tel lo tura inchah te pawh an awm a, hei hian hnu chhui a tibuai thlak thin a, an sawi duh loh tlat chuan kan tan tih theih a awm bawk si lo a, mipui lam hian thu dik sawi thin se kan duh hle a ni," tiin Lalbiakthanga Khiangte IPS, State contact tracing team hotu chuan a sawi a. 

"Covid 19 positive zingah an kaina awm hre lo tak tak an awm rualin thenkhat chuan an kai theihna awm an sawi mai duh lo a, containment area atanga a ruka chhuak te an awm lehzel a, quarantine peih loh vanga dan pumpelh dan zawng te pawh an awm a, hengte hi a thehdarhtu an nih zel theih avangin ngaihtuahna a ti thui duh hle a, invenna lamah fimkhur a ngai lehzual a ni," MoT lam chuan an ti bawk.