Aizawl: Health Minister Dr. R. Lalthangliana hova Mizorama COVID-19 hripui leng mek dinhmun thlira nimina thukhawm chuan Aizawl Municipal Corporation (AMC) huam chhunga Total Lockdown kalpui mek chu kar khat dang (August ni 7, 2021 zanlai dar 12 thleng) pawhsei an rel a, hemi hun chhunga inkaihhruaina dan leh AMC area pawn lama kalpui dan tur chu State Executive Committee on State Disaster Management Authority in an ruahman ang.

Health Minister hova thukhawm chuan Mizoram dinhmun leh a bik takin Aizawl dinhmun an thlirin hri leng inkaichhawnna in a vawr tawp a thlen mek laia inthlahdul chu a rem rih loah an ngai a, hetih rual hian sample test runpui neih mek pawh ngawrh taka kalpui chhunzawm tha an ti a. Meeting-ah hian sawrkar laipui lama H&FW Ministry hotute chuan sample test zat atanga hri inkaichhawnna (positivity rate) 10 % aia sang a nihna district ah chuan khauh taka inkaihhruaina kalpui tur a ni tih an sawi thu tarlan a ni bawk a. Mizoram Police Aizawl khawpui huam chhunga duty te chu ramri lamah thawn thlak deuh vek an nih avangin Total Lockdown kalpui chhunzawm chhung hian LLTF te leh YMA te chu theihtawp chhuaha ngawrh taka duty chhunzawm tura ngen an ni.

Dr. R. Lalthangliana chuan ICMR hotute hnenah RTPCR test kit leh a bawlhlote Mizoram tana rawn pe leh tura a ngen thu sawiin, ICMR lam chuan RTPCR Test kit 20000 bakah a bawlhlo Viral transport Medium (VTM) leh rna Extraction Kit 20000 ve ve, a vaiin cheng vaibelchhe 5 man hu vel chu a thlawna an rawn pek tur thu hrilhin karleh hian a rawn thlen hman beisei a ni, a ti. Rapid Antigen Test kit chungchangah thlaphanna tur a awm loh thu meetingah hian sawi niin, nuai 1 lo thleng tur a awm bakah nuai 2 dang pawh order fel tawh a nih thu meetingah hian tarlan a ni a, RAgT kit man a tlakhniam zel avangin RAgT hmanga sample test man pawh Rs. 100/- ah tihhniam a nih tur thu sawi a ni.

Nimin meeting-ah hian MOT Chairman Dr. ZR Thiamsanga, AMC Mayor Lalrinenga Sailo, Chief Secretary Lalnunmawia Chuaungo, Addl. Chief Secretary JC Ramthanga bakah COVID-19 dona kawnga hmalatu department hrang hrang hotute,  Indian Medical Association, Medical Operational Team, Jt. NGO Coordination Committee  leh Mizoram Kohhran Hruaitute Committee (MKHC), Local Task Force aiawhte an tel a ni.