Aizawl: Health Minister Dr. R.Lalthangliana chuan nimin khan Lengpui-a Community Covid Care Centre (CCCC) atana hman mek Government Middle School-I tlawhin hemi hmuna duty te nen an inkawm a, Minister hian CCCC mamawh chi hrang hrang PPE kit, Hand Sanitiser, Face Mask bakah theirah Apple leh Grape a pe a, Oxygen Concentrator leh damdawi thahnem tak bakah sumfai a hlan a ni. Apple leh Grape-te hi Nghalchawm leh Airport-a Covid Duty-te a pek kep nghal a ni.

Lengpui CCCC-ah hian Doctor leh Task Force duty-ten Minister hi lo dawngsawngin Dr. Thangtea chuan, "Lengpui hi Mizoram luhkapui ber pakhat a ni a, nitin phai lam atanga zin haw thlawhtheihna rawn tum thinna hmun a nih vangin tunlai boruakah phei chuan thawktute tan pawh fimkhur a ngai lehzual em em a. In hnathawh mek hi mihring hriselna leh nunna hial thapa thawh ngai a nih vangin tlawmngaihna leh mihringpuite hmangaihna tak tak nen lo chuan thawh ngam chi a ni lo," a ti a. Mizoram puma COVID-19 hri kaite enkawlna hmuna duty te leh Frontline / Healthcare workers zawng zawngte hnathawh chu ropui a tih thu sawiin, "Zoram mipuite pawhin an tan bang lova kan tawngtai a ngai a ni," a ti.

Lengpui CCCC a tlawh hnu hian Airport-a duty te tlawh lehin inkawmhona hun tha tak an hmang a, Airport-a duty te hian an mamawh chi hrang hrangte Minister hnenah hian an lo thlen a, Minister chuan puih an ngaihna leh an mamawh angte chu lo ensak a tiam a, an harsatna tawhte leh mamawhte chu inthlahrung lova sawi zel turin a hrilh a ni. 

Minister Thangtea hian Union Health Minister Dr.Harsh Vardhan chu telephone-a a biak thu sawiin India ram State 18 chauha pek tur COVID-19 hri kaite enkawlna damdawi man to 'Tocilizumab' chu pe ve turin a ngen tih a sawi a. "Union Health Minister hnenah hian Covid Vaccine kum 18-44 chin chu a thlawna pek kan tum thu ka hrilh bakah kum 45 chin chunglam pawh vaccine la lo an la tam avangin tam tham deuh Vaccine min rawn thawn thuai turin ka ngen a, DO Letter ka thawn nghal bawk a ni," a ti bawk.