Aizawl: Health Minister Dr. R.Lalthangliana chuan nimin khan Vanghmun khua, Zampui, Tripura-in an khaw kum 100 tlin Centenary an lawm chu a hmanpui. Dr. R.Lalthangliana chuan, “Geographical boundary-in Zofate hi hmun hrang hrangah min thendarh mahse kan thinlung erawh min thenhrang ngai lo vang. Zofate inpumkhatna tura hmalak hi MNF sawrkar ding thar mek tih tur pawimawh tak zingah kan telh a. Zofate luahchin ram rorelna pakhat hnuaia a awm theih nan hmalak kan tum a, Zohnahthlak inpumkhat nan sawrkar angin nasa taka hmalak kan tum bawk a ni,” a ti. Dr Thangtea chuan, “Zofate ram hrang hrangah thendarhin kan awm a, heng mite dinhmun hi kan ngaihtuahnaah a awm reng a. MNF sawrkar hmasa khan Zoram pawna Zofate chungchangah kan tih tur kan tih tawk loh a awm a tih kan hria a, sawrkar leh party aiawhin thinlung takin ngaihdam ka dil a ni,” a ti bawk. Health Minister chuan, “Tuipuibari lam atanga Zampui tlang panna kawng kal theih lova a awm ta ringawt hi sawrkar chuan pawi a ti tak zet a. He kawng tha taka a tlang leh theih nan Mizoram sawrkar chuan hma a lak ngei ka ring a. Tuidam atanga Rulchukkawn kawng MNF sawrkar hmasain tha taka a laih tlang hi Tripura sawrkar hian a tih tur a ti tawk lo deuh niin a lang a. He kawng, Aizawl hnai taka in kal theihna tur hi tha taka a tlang theih nan Tripura lam pawh hi hma la turin ngen ka tum a ni,” a ti bawk. Dr. Thangtea hian Vanghmun Centenary lawm nan Rs 30000/- a hlan bawk. Vanghmun khua hi Sailo lal ropui Suakpuilala fapa, Dokhuma Sailo-in kum 1919 a din a ni a. Vanghmun khua atang hian mithiam an chhuak tam hle a, tunah hian in 300 vel niin mihring 1000 chuang an cheng mek a ni. Centenary lawmna hi January ni 3 khan Behliangchhip atanga Centenary meichher lain hman tan a ni a, January ni 6 hian a lawmna hi khar a ni ang.