ZALEN June 4, 2025 : MPCC chuan ZPM Southern Hqrs, Lunglei Party chhung inkhawm leh Political Session a Health Minister Lalrinpuii'n Aizawl Private Hospital te nen an inrem lawk theih loh chhan sawiah 'Sawrkar hmasa lama bat ral sak a tam thin em vang a ni, tunah chuan nasa taka an inngen hnuin Cashless thei turin inbiakna an kalpui reng a ni' a tih chu thu dik a ni lo, tiin thuchhuah an siamah an tarlang.

Sawrkar hian a ba in cashless-in damlo te enkawl turin private hospital te hi a turlui a, an duh lo phawt zawk a ni. Private hospital te reuh tete te tan ba ringawta inenkawlin an tlinloh an hlauh vang a ni, an ti.

Hei bakah hian sawrkar in damlo enkawlna tura rate a siam te chu hman mek te aiin 50-70% in a tlawm zawk a, private hospital te tan MUCHS chu pawm theih a ni lo zawk a ni, an ti.

Health Minister in heng harsatna te hre vek a, sawrkar hmasa tena an bat ralsak a tam em avanga MUCHS hi kalpui mai thei rihlo tia mipuite dawt a hrilh mai hi a dik lo.

Harsatna tawh pianga sawrkar kalta te a rem leh remlo pawh dawn lova dem kur luai hi mahni hamthat nana mipuite rilru lakpen tumna niin a Mizo-Christian zia lo hle an ti bawk.

Research-based veka kala inzuar leh ruahmanna lo siam vel fek tawha insawite hian sawiloh anga awm zel lovin an sawi anga awm zel tum tawh se, an ti.

Congress sawrkar hunlai zawng khan mipui tan Healthcare tha tak sawrkarin a ruahmansak thei a, Private Hospital te pawm theih in leh a chhawrtu mipuite pawhin hun reitak nghah ngai lova an bill te an hmuh let theihna turin ruahmanna tha tak a siamsak kha a ni a. Vawiin ni ang a rate in barhluih tum ang ni lovin, sawrkarin mipuite leh Private Hospital inlawm tawnin miharsa ber leh rethei ber pawhin Private Hospital tha ber ber a an inenkawl ve theih nan Healthcare Scheme tha a siamsak zawk a ni.