Galili ramah chuan fur khawchhe zual leh khawvawt zual a reh deuh tawh a. Nisan (April) 14-a Jerusalema Kalhlen Kut hmang turin Judate chu an inbuatsaih mup mup tawh a. Kalhlen Kut chhung hian Isua chuan manin awm ang a, Krosah an khengbet dawn tih a hriat avangin a zirtirte chu Philipa Kaisari-ah a hruaia, a thih tur thu hi a hrilh a. A thusawi hi an la hrethiam tawk lo tih a hriat avangin kar khat hnuah a zirtirte zinga Pathum Peterate, Johanate leh Jakobate chu Hermon tlangah Camping a neihpui a ni. 1. Petera leh a thiante hian Isua hi tisa mit chuan an hmu fo tawh a, mahse thlarau mita hmu turin intawnna (Personal Encounter) an la neih loh avangin Hermon Tlangah hian Isua‘n a van ropuina hmel a entir a. “Hei hi ka fapa, ka thlan a chu a ni, ama thu zawm rawh u” tih Pathian aw a hriattir bawk a. Hei bakah Isua Mission chiangtaka an hriat theih nan Mosia leh Elijaten, “Jerusalema a thih tleitlakna tur” Isua hi an rawn sawipui a ni. Hermon Tlanga a thil tawn hian a nun a khawih danglam hle a ni ang, a hnu kum 34 vela Kohhranhote lehkha a thawnah Petera chuan, “A ropuina chu mit ngeia hmutute kan ni” tiin a ziak a (II Pet 1:16). Johana pawhin, “A tir atanga awm, kan benga kan hriat, kan mita kan hmuh, ngun taka kan en, kuta kan khawih nunna thu chu kan ziak a ni” (I John 1:1) tiin a ziak bawk a. 2. Hermon Tlang Camping thupui, “Isua thih tleitlakna” thu hi a pawimawh em avangin kum 1000 chuang kal taa thi tawh Mosia leh Elijate chu he Agenda hi Isua sawipui turin mitthi khua atangin an lo kal vang vang a ni. Sawi tawh angin he thu hi Isuan Kaisara Philipi-ah a zirtirte a lo sawipui tawh a. Petera’n a hriatthiam theih loh avangin, “Setan, ka hnungah kal rawh,” tiin Isuan a lo kamkhat tawh a. Heti chung hian Petera chuan Hermon Tlangah pawh hian Isua Kraws pana a kal hi dal tumin Bawkte khawh a lo la rawt thei ta cheu a. Petera hian, “Eng nge a sawi pawh a hre mumal lo va ni,” tiin Luka chuan a ziak kher kher a (Lk 9:33). Petera hi dem tur kan awm lo vang. Keini pawh camping kan han nei a. Phur takin kan zaia kan lam a. A phur zualin, “I nawn mai ang u,” an han tih chuan tumah hnial ngam kan awm si lo va, kan nawn tlut tlut mai thin a nih hi! Mizo hian thutak aiin rilru phurna hi kan tuipui tlat a. Kohhran programme tam ber pawh hi thutaka inchawm tumna aiin inchawhphur tumna a ni ta deuh vek a. “Zirtirna dik an ngaih peih loh hun a la thleng dawn si... an bengte chu thutak lamah an chhu ngawng ang a, thawnthu lam panin an peng tawh ang” (II Tim 4:3f) Paula’n a tih hun kan thleng ta mek a ni. Rilru phurna hian ngaihtuahna fim hmang thei lovin min siam thei a, mahni nuam tih zawng ringawt um turin mi a hruai thin. A tawpah phei chuan phurna hi thutak emaw kan ti thei hial thin a ni. Thutak chuan Kraws kawng a zawh a, pumpelh a awm lo. Chawimawina leh lansarhna thlahlel Kohhranah chuan thutak a mikhual a, lemchan thiam an tlangnel thin. Thutak pai lo Judate chu, “Nangni inchawimawi tawn lawmte u, engtin nge in rin theih ang?” tiin Isuan a zilh a ni (John 5:44). Hman deuh khan Africa ramah mingohovin mihang an rapbet tlawk tlawk thin a. Salvador khuaa Archbishop Romero-a chuan, “Hetiang inrahbehna hi ‘Injustice’ a ni,” tiin aw a chhuah a. A nunna a chan phah a (M.M Thomas : Revolution of the Opressed people pg. 16). Vawiin thlengin thutak tantute chu “Khenbeh” an la ni ta zel a ni. Mi dawihzep, hrehawm tuar peih lo, hmun ralmuang (Comfort Zone) atanga Juda Puithiam leh Levia chi anga mahni nun humhim tumtuten Isua zui tak tak theih a ni lo. 3. Zan khawvawt takah Isua hmel leh a silhfente a lo danglam a. Mosia leh Elijate an rawn inlar a. “Hei hi ka fapa, ka thlan a chu a ni, ama thu zawm rawh u,” tiin chhum atangin aw a lo chhuak a. Petera leh a thiante chu an lo muthlu thei a nih chu mawle! Kar khat hnuah Gathsemani huana Isua an man zanah Isuan, “Ka rilru a lungngaia thihna khawp hial a ni... min venpui rawh u,” tiin Peterate hi a ngen ngawih ngawih a. (Matt 26:38). Heti chung hian Peterate chu kaihharh theih loh khawpin an muhil leh bawk a. Peterate hi muthilh dan pangngaia muhil an ni thei lo vang. An rilru a muthlu a ni zawk ang. Rilru inthlahdahna, engmah vei nei lova thutak ngaihtuah tlang peih lohna, Sapin “Apathy, Lethargy, Complacency” an tih hi mihring hmelma a ni a, mi tam takin an nih tur ang an nih loh phah a ni. “Religion and Rise of Capitalism” tih lehkhabu ziaktu R.H.Tawney-a chuan, “The Church ceased to count because the church had ceased to think,” a ti a (qouted by L.M Schiff in The Christian in Society page 66) Kohhranin ngaihtuahna a hman loh avangin a pawimawhna a hloh a tihna a ni awm e. Han sawi zau deuh ila. Sawrkar din chhan chu mipui venhim, zalenna pek leh hamthatna (Welfare) ngaihtuahsak a ni. Sawrkarin a mawhphurhna hi a hlen duh loh emaw, a hlen theih loh emaw chuan Kohhranin a sawisel ngam tur a ni a, a siam that dan kawngah pawh thurawn a pe tur a ni. Entirna han siam ila. 2013-14 a Mizoram Budget chu Rs 5,000 Crore (Vaibelchhe sang nga) chuang a ni a. Hemi bakah leiba Rs 5,334.81 Crore (Vaibelchhe sang nga zathum sawmthum pali nuai sawmriat pakhat) kan nei a. Leiba hi kumin kum tawpah chuan Rs 5,651.27 Crore (Vaibelchhe sang nga zaruk sawmnga pakhat nuai sawmhnih pasarih) tling tura chhut a ni a. Pawisa kan hmang tam tawlh tawlh a, mi rethei an rethei tawlh tawlh a, kalkawng a chhe tawlh tawlh bawk a. Hei hi eng nge a chhan? Pawisa hi mipui hnenah rualkhai zawkin engtin nge kan sem theih ang? tihte hi Kohhran leh NGO te hian tih tak takin kan ngaihtuah ngai lo niin a lang a. Kan harsatna hi mutthluksan theih a ni tawh lo. “Nang muhil tho la, i Pathian ko rawh,” tiin Jona angin ringloten min thawng palh ang e! Thil dik lo hmua sawisel ngam loh hi sual tih punlunna a ni thei. Danglam ngam lo “Status Quo” thlawptu (Supporter) chu “Lakhawmtu ni lovin tidarhtu a ni” (Lk 11:23). 4. Hermon Camping a tiak hnu hian Isuan Peterate hi a thih tur thu a hrilh nawn leh a. Thilmak tak chu - Peterate hian an Hotupa lungngaihna hi tuarpui tak aruangin an thih hnua a hmun ruak tur inchuhin “Kan zingah tunge ropui ber ang?” tiin an inhnial a nih chu mawle! (Lk. 9:46). Peterate ang tho hian Kohhran pawh hian Khawvel ropuina hi “Bye Bye” harsa kan ti thin a ni. Kum zabi 4-naah Constantine-a Rome Emperor a lo nih khan Kristiante chu duhsak takin a enkawl a. Hei vang hian an lo hausain khawtlangah pawh ngaihsan an lo hlawh ta a. Kohhran chu pawn lam lang theiah chuan an thang uak uak a, an thlarau nun erawh chu a rethei tawlh tawlh thung a. Bishop Gore-a chuan, “When Constantine was converted the Church was perverted,” a ti hial a. (Ibid pg 53) “Constantine-a a pianthar chinah Kohhran a kalsual ta” tihna a ni awm e. Kristiante an lo zalen a, an lo hausak tak avangin mi ngaihsan an lo hlawh ta a. Thlarau riltamna tihrehna atan ni lovin dinhmun tha siamna atan leh eizawnna atan Kohhranah an lo lut ruih ruih ta a. Pa pakhat chuan Pope Damasus-a hnenah, “Make me a Bishop of Rome and I will become a Christian,” a ti e an tia lawm! (Ibid page 53) Mizorama Kohhrante pawh hian sum leh dinhmun kan lo buaipui ve ta hle a. Kohhran lian deuhte phei chu hausak pawh an lo hausa ta. “Ka hausa a, sum ka ngah a, engmah ka tlachham lo ve,” titu Laodikei Kohhran chu Kohhran neitu chuan, “Mi rethei, khawngaihthlak, pachhia, mitdel, saruak,” a ti tlat. (Thup 3:17f) Keiniho kum tin vaibelchhe tela target khum thin, Krista khenbeh thu aia target khum thu tuipui zawkte hi Kohhran neitu hian eng angin nge min ngaih ve ang le? Sum leh pai hmanga Pathian ram din tum chu tlakchhiatna a ni. Simona chuan Pathian thilthlawn pek tangka suma lei a tum avangin Petera chuan, “I tangka nen hian boral rawh u” tiin a hau a ni. (TT 18ff) Mizorama Kohhrante hi Dikna (Justice) humhalh leh mi bote chhanchhuahna hna kalsanin Biak In neih thatah te, Missionary tirh tamahte, hnathawktute hlawh pek tamahte, TV leh Chanchinbua lan tamahte kan inel ang tih a hlauhawm. Zawlnei Elia fate an pamham lutuk avangin a thlahte chuan, “Ei tur kan hmuh theih nan Puithiam hna eng emaw tal min thawhtir ta che an la ti ang,” tih hi Pathian thu chhuak a ni. (I Sam 2:36). Kohhranin sum an buaipui lutuk tak avangin an Beramte chuan Pathian ram theihnghilhin Pastor leh Missionary nihte hi eizawnna remchangah ngaiin an inchuh ve tan ta a ni lo maw? Hermon Camping thupui hi kan inhrilh nawn a tul ta a va ang ve? - K.L.Rochama