ZALEN August 29, 2023 :  Tun lai hian drugs ti thar an pung a, thingtlang lamah pawh thihpui an awm tawh avangin damdawi hman sual vanga thi chhinchhiah aia a tam rin a ni a, hetihlai hian tunhma lama Heroin aiin tunlaia heroin te chu a fir (pure) tha tawk lo zawk tih finfiah a ni.

Excise & Narcotics Department thawktute chuan thalai zingah drugs tithar an pung nasa tih sawiin, thingtlang kilkhawr deuh deuh thlengin thihpui an awm. Department-in damdawi hman sual vanga thi an chhinchhiah aia tam damdawi thihpui hi an awm a rinawm niin an sawi bawk a. Drugs addict-te chu khawmin home-ah te dah thin bawk mah se, khawm reng chu a buaithlak niin an sawi bawk.

Tunlaia heroin chu a tak lo deuhin a hmel pawh a dang nia sawi awm chungchangah Excise & Narcotics Department thawktute chuan, “Tun hma chuan heroin hi a var a ni thin a. Mahse, tunlai hian a sen deuh a ni a; mahse, a lem erawh a ni lo. A tak (pure) leh tak loh chungchangah chuan tun hma chu a tluk lo a. Forensic Science Laboratory-in an tehnaah a pure lam tun hma deuha 90 vel ni thin kha tunlai chuan 80 vel a ni,” tiin ZALEN an hrilh bawk.