Tualchhung Tinreng

Heroin a vang tan

Admin - May 02, 2021

Myanmar atangin heroin lo lut tam thin hle | Myanmar ram a buai hnuah erawh lo lut a tlem | Heroin a vang tan nia thudawn a ni

Mizorama damdawi mangsual ten ruihna atana an hman ber heroin hi Myanmar atanga lo lut a ni tlangpui a. Assam Bagha lam atang pawhin tlema zawng a lo lut bawk a, a bupui chu Myanmar atanga lo kal a ni. Tunhnai khan Myanmar atangin heroin lo lut hi a tam hle a, mahse Myanmar ram a buai hnuah erawh lo lut a tlem a, heroin a vang tan nia thudawn a ni.

Mizoram Excise & Narcotics department thawktute chuan Myanmar rama sipai in rorelna an chan tirh khan sum leh pai ah harsatna a awm avangin mi tam takin an heroin kawl sa te chu tihralna zawngin Mizoram an rawn panpui tih an sawi a. "February thla tira sipai ten sawrkarna an lak atang khan Mizorama heroin lut hi a pung hluai mai a, kum danga kumtluana kan man zat chanve aia tam chu thla 3 chhungin kan man hman der mai a. January-March thla chhung khan heroin hi kgs 7.017 kan man a, kum dangah chuan 2019-ah kum tluanin kg 12.596 leh kum 2020-ah kum tluanin kg 11.710 te kan man a. March thla bikah phei chuan kan man tam hle a ni," an ti.    

Excise & Narcotics department hotute chuan heroin hi Tahan ah an chhekkhawl thin nia sawiin lei duh an awm chuan Tiau ah an pe thla leh thin niin an sawi .
Myanmar ram politics buaina avangin drugs siamna hmunpui golden triangle atangin damdawi a lo kal thei lo a, hei vang hian April thla atang khan heroin pawh hi a vang tan hle niin an sawi. Excise department chhinchhiah danin kuminah hian damdawi hmansual vangin mi 24 an thi tawh a ni.

Excise & Narcotics department hotute chuan ruihhlo chi khat methamphetamine kalkawngah Mizoram chu awm mahse he damdawi ti thin chu Mizoramah an awm meuh lo niin an sawi a. "Mizoram kaltlanga 'meth' tawlhruk 99% hi Mizoram pawna mi tur a ni a. Mizo thalai zingah meth khawih an awm lem lovin kan hria a, Zokhawthar a porter (mutia) zingah ti zeuh an awm niin an sawi a, hei bak hi chu ti an awm kan hre lo a ni," an ti bawk. 

Mizorama meth tawlhruk chungchangah Karimganj lam mi an inrawlh nasa tih sawiin heng mite hian Kolkata kaltlangin Arab ram lamah an thawn leh thin nia an hriat thu SND hotute chuan Zalen an hrilh bawk.